Heithaw wow pynsuk ya kiwa yaleh NEET-UG 2024 kiwa na Ri-loom Jaiñtia heiwa da yoh thaw thoh Exam ha St. Mary Mazzarello Higher Secondary School Jowai yow lait ki u lai cha kiwi ki thaw wa cha jngai, da man pathan wow pynkulmar wei pyndooh mynsien ki heiwa dapoi ar tylli ki thup yukylli (Question Paper) wa da phah yaki wow jubab ki kiwa phær bak-la-bak.
Kini kiwa lai thoh ya kani ka Exam da khana ki wa i por wow thoh Exam toh u sdang 2:00 waje ynnin ka sngi tangwa kat u yoh u thoh dapoi hadooh 2:15 wei hadien kiwa pynlai Exam da pyrchang ki wow pyntikna kawon ka Question Paper kawa toh, da sepai i por kamwa 40 minit wei ym em e pyntam yei por ya ini wa da dooh ki.
Ka Question Paper toh u em kawi donhi, ka QRST Series (rong stem) kamwa da yoh ha waroh kawi ka ri tangwa em kiwa da yoh daka MNOP Series (rong soo) wei em ki kamra wa yoh pyn artylli.
Kamtæ kiwa yaleh Exam da sdang ki wow thoh yei jubab tangwa da wan chah knieh neibhah da ong waka QRST toh kawa bakla wei kawa biang toh ka MNOP tangwa hadien won da e laad ya kiwa thoh Exam wow jied ki da kawon wow jubab ki iwa da pynkulmar chooh chooh.
I kulmar da mih chooh chooh i neidaw wa kiwa pynlai yaka Exam leh ymtip ki deiwa tikna kawon ka Question Paper kawa toh wei kawon kawa bakla wei da em uwi uwa da dep jied wow jubab dei ktien Hindi tangwa da yoh u da kawa hei ktien English wei oo hawa kut da yoh u le tylli ki Question Paper.
Ye u man wa neidaw wa ini toh i sien nyngkong wa da pynman ya kani ka NEET ha kani ka thaw heiwa kiwa wan thoh Exam da ong ki wa ki Exam Invigilator ym tip tang u chim Attendance leh.
Ki khynnah wa yaleh Exam da pynsñiaw ki yei diaw mynsien neibhah da dep ki wow pynkhreh ya kani ka Exam da slem wei manda jia kamni da dooh mynsien ki wei da em leh na ki kiwa daw kut noh i rta wa ye ki u yaleh ya kani ka Exam wei lada duna chi Marks leh ye u dooh lai puræ ha ki Medical College.
Da mih leh i kulmar hadien wa kiwa pynlai Exam ym em chim ki yaki Admit Card heiwa ki khynnah wa jooh yaleh ya kani ka Exam da ong ki wa hap ki wow chim yaka Admit Card hadien wa dep thoh Exam tangwa kiwa pynlai Exam won da ong wym emkaam tangwa da em kiwa da wan dei miet yow lai pynuiñ yaki Admit Card.
Kawi na kiwa yaleh ya kani ka Exam da ong ko kiwa pynlai yaka Exam da ong ki wym emkaam u chim yaka Admit neibhah lada ksoh hapoh ka skur daw kut man kot song chana donhi ko.
Neiliang ki khynnah kiwa da em 136 ngut ha kani ka Exam Centre da thoh ki leh cha u Controller NTA (NEET-UG 2024) yow leh u yeiwa emkaam.
Discussion about this post