Mih kulmar ynnin ka sngi ha North Eastern Indira Gandhi Regional Institute of Health & Medical Sciences (NEIGRIHMS) hadien wa uwi u khynroo uwa mynsoo hei tyrrah kari da khlaad noh u wei da mih i pynbaad na kiwa ha-yung ha-sem, ki lok ki jor wa kiwa emyatoh u wa lehstiñ kiwa kreh hadooh wa poi chei yap u.
Uni da mynsoo u ha Damsite heipor kamwa 11:00 waje i step wei da kit ya oo da ka Ambulance wei dapoi u ha NEIGRIHMS heipor kamwa 12:20 i sngi heiwa da pynbaad wym em Doctor wa wan pait oo hadooh soo kynta. Hadien wa khlaad u da mih i awri awri da kiwa ha-yung ha-sem kiwa da ong wa dang im u heipor wa wanrah ki oo hadooh wa hap khut ya ki pulit wow pynjai-jai hadien wa da joor bha i kdaw kti wei ym de ki bru ka Hospital wow pynsñiawthooh ya kini kiwa da chrai yeiwa da jia.
Kini kiwa ha-yung da ong ki wa mynsoo u du ha ki kjat donhi wei da booh ya oo hapoh ka Emergency Ward tangwa ym em e dawai næ sumaar oo 4 kynta hadooh wa yap noh u.
Neiliang kiwa pynlai ya ka NEIGRIHMS da kyntait ki yeini deiwa ong wa hadien wa wanrah ya uni uwa mynsoo da yaleh ki katwa ye wow pynim oo neidaw wa da toh u neibynta i rupai deiwa joor bha wei da e dawai kamjooh da leh X-Ray waka Ultrasound tangwa ym ye de wow pynim oo wei da khlaad u heipor 2:30 i sngi.
Ka NEIGRHIMS da kyntait ko leh wym em Doctor deiwa ong da em 10 ngut ki Doctor nadooh kiwa dang khain hadooh kiwa da heh deilang wa ki Specialist.
Heiyatoh wa ini, ka Montri ka chnat i chait i khiah, ka Dr. Ampareen Lyngdoh da ong ko wa da chimkhia ko yeini wa pynbaad wa lehstiñ kani ka thaw sumaar wei dang yang ko ya ka Report wa bniah hajrong ini wa jia.
Kiwa ha-yung da ong biat ki toh wa mynsoo joor u ha i bynta ki kjat u wei chibet da wan pyntip cha ki wa da khlaad u tangwa hadien won da pyntip wa dang im wei hadien da wan biang wow pyntip wa da khlaad u iwa da pynchrai ya kiwa ha-yung uni u khynroo heiwa da pynbaad ki leh wa hadooh 4:00 waje i janmiet leh ym em wan Doctor wa wan pait wan sumaar.
Discussion about this post