Ka yachemlang namo ka Joint Meeting kawa ar hapyrdi ka KSU Narpuh Circle wa ki waheh chnong ka thaaiñ Elaka Narpuh da pynman ynnin ka 3 tarik ha Mynkre, wei ha kani ka yalang da iwi i yumut da chim ya ka rai wow lai chakhmat yow pynman da ka yakhih paidbah ha ka 8 tarik uni u bnai hajrong i wym bna wei leh mutlop ka sorkar waka National Highway Authority of India (NHAI) ki wym chimkhia yow pynchna ya u surok NH6 uwa da sih palatpood ha ka thaaiñ Narpuh nadooh Mynkre chadoh Ratacherra.
Ini toh wot hadien wa da dep e yei thoh cha u DC ka East Jaiñtia Hills District yow dawa ya ka NHAI wow sdang pynchna hapoh 7 sngi nadooh ka tarik wa da e dorkhat tangwa hadooh katni ym yoo ki dak iyi iyi.
I e por toh iwa da kut ha ka 2 tarik uni u bnai, kamtæ da chim ya ka rai wow pynman da ka yakhih paidbah ha surok NH6 hapoh thaaiñ Elaka Narpuh.
Ha kani ka yakhih daw em i rah lang yei thoh wow beiñ joor ya ka sorkar wa ya ka NHAI hajrong i sih uni u sarok neibhah ymtoh de i sien wa nyngkong tangwa da ki boon boon snem wei ini da pynyoo wym kheiñ bru de ya ki paidbah yong ka thaaiñ.
Ini i yakhih paidbah u pynman leh deiwa mih cha sarok deiwa yalang chi thaw, kamtæ da kyrpaad ya waroh ki kari kamai Tourist kiwa khian wa kiwa heh wa kiwa wan na baar jylla kiwa lai lyngba uni u sarok wow sñiawbha wow e yei kyrchaan yong ki deiwa ya ksohktilang ha katai ka yakhih deiwa sangeh chi sngi ya ki kaam yong phi waroh nadooh ki Truck Dumper wa kit moochuni, ki kari Sumo wa kamai na Lad Rymbai cha Kalaiñ Badarpur.
Kani ka yakhih u pynman nadooh 10:00 waje i step hadooh 4:00 waje i janmiet.
Ka yakhih u man ko kawa jai-jai yow kiar nei mih kulmar neibhah ka yakhih toh yow dawa yei hok wei u pynlait ya ki kari kiwa thoh khubor wa kiwi kiwi kiwa emkaam jhan wow lai ki kamwa jooh man hi. Da maham leh ya kiwon kiwon kiwa wanrah yei pynkulmar wei lada em kam kitæ, ka seiñ wa ki waheh chnong ym chim ki yei kitkhlieh.
Discussion about this post