Ki soo ngut ki Bangladeshi kiwa da yoh wow kem na khappood ka South West Khasi Hills, da e ki boon ki daw yei wan psiah ki cha India heiwa uwa cha kem nyngkong da ong u wa wan thooh Chok-Chok (Gecko) u yow dai katwa kiwi ki le ngut wa chah kem hadien won da ong ki wa ki toh dkhot ka Awami League kawa man ka Party ka Prime Minister warim ka Bangladesh wei da wan ki wow paan yarap na India yow yada ya ki.
Tangwa ki pulit da ngait ki wa kini ki bru da psiah ki cha India dei thmu wow leh ya ki kaam damok katkam ki sakhi sabut wa da chem.
I pyntip wa kattæ na ki pulit toh wa ha ka 8 tarik heipor kamwa 11:00 waje i step da pyntip cha ki wa hei miet ka 7 tarik hadooh wa kylla tarik cha ka 8 tarik uni u bnai, da em kamwa 8-9 ngut ki bru wym tipmit kiwa da psiah chapoh iwi i dukan wa em ha chnong Rangdangai wei da rahbor ki ya u Balsrang Marak cheiliang ka chnong New Rongdangai.
Hadien wa u Balsrang yoh laad u wow yut da psiah u ha iwi i yung wa em ha New Rongdangai wei da khang u ya ka dwar tangwa kini ki bru da kdong ki oo wei da sngoh dwar ki ka kani ka yung heiwa da siat kuli ki kattu katni sien. Kamtæ kiwa em hapoh kani ka yung neidaw wa tieñ da wai dwar ki wei kini ki damok da bom da dat ki oo u Balsrang wei da mih noh ki neini i thaw.
Heipor kamwa 2:15 i sngi ka 8 tarik won, da pyntip cha ki pulit da uwi u tre Quarry wa em ki bru kiwa kieñ tiar pynmynsoo kiwa da psiah cha i thaw u wa em ha Khonjoy. Kamtæ u OC ka Nonghyllam da lai u cha kani ka thaw wei da chem ya ki bru wa em kamwa 8-9 ngut kiwa da sdang wow yut.
Neiliang u OC da phah u ya ki wow sangeh wei da siat u ar kuli cha suiñ wei kattæ leh ym em sangeh kini ki bru heiwa da yut ki chapoh khloo.
Hawa kynreh ya kani ka thaw da chem ya u sdai, ka Barbwire Cutter, ka snop thap Magazine, ka Face Mask, u Screw Driver, ka 200 mm Adjustable Wrench, ka thaw thap (Hoslter) Pistol, ka tari khian, ka Bangladeshi Police ID Card, le tylli ki snieh-poisa, le tylli ki Wireless Handset deilang wa 4 tylli ki Charger, kawi ka Stainless Steel Crad Holder, kawi ka Keypad Phone Charger, soo tylli ki Mobile Phone wa kynthup ya kawi ka Keypad Phone wa u USB Cable.
Da chem leh 3 tylli ki Medical Prescription Dawai yong u Mahfus Bangladesh, kawi ka thaw chut kharat, uwi u hatkari, 10 tylli ki kot poisa Bangladesh kiwa poi 769 Bagladeshi Taka, kawi kot 500 ka poisa India wa le tylli ki Micro Explosive.
Kamtæ deiwa yaraplang ki BSF da kynreh ya kani ka thaw wei heipor 8:00 waje i step ynne, kiwa chong chnong ka Khonjoy-B da yoh ki wow kem ya uwi u bru wa tip kam u Mefus Rehman (35 snem) uwa na Debidar District, Cummila Bangladesh uwa da lai rah ki pulit cha Nonghyllam PS.
Hadien ini won ki pulit deilang ki BSF da yoh ki wow kem sa le ngut kiwi na khloo Chibak kiwa tip kam u Jangir Alom (25 snem) uwa na Jamalpur District ka Bangladesh, u Meruphur Rahman (32 snem) uwa na Mandargaon District, Jamalpur Bangladesh wa u Saem Hussian (30 snem) uwa na Siddirgonj District, Narayangonj Bangladesh.
Ki pulit da pyntip ki wa dang thooh ya kiwi de kiwa dang yut.
Discussion about this post