Ka e sikai wa chitayaw yong ka Lei Synshar Cultural Society ya ki khynroo khyllood ka Niamtre wa da pynman ha chnong Nongkynrih, Laskein Block watip kam ka 28th Youth Development Camp, kawa da sdang nadooh ka sngi Pynsin 8 tarik Naisan da poi ko leh cha wakut ha ka sngi Khyllaw 15 tarik Naisan 2022.
Ha ka yalang pynkut wa da pynman ha Yung Dorbar ka chnong Nongkynrih najrong kiwa yahkhmat ka Lei Synshar Cultural Society dawan sakhilang leh da u Chawas Lyngdoh, Dolloi Elaka Raliang kam u kongsan hei emlang u Shape Paswet, General Manager ka District Commerce & Industries Center, ka sorkar Meghalaya kam u symbood kongsan wa kiwi ki waheh wasian, manbei manpa wa chah khut sñiawbha.
Ka Meena Laloo, President Lei Synshar Cultural Society kam ka chongknor yong ka yalang da e ko ki kyntien yahkhmat, wei da siang ya ki kyntien pynapblai pynapsyiem da u khynroo Junom Suiam, Chairman KKC Shangpung neitæ u khynroo Checki Rupsi waka khyllood Idaroi Sungoh yieñ ki wow e i klam neibynta yong waroh ki khynroo khyllood wa wan chah sikai cha kani ka Youth Development Camp katwa u Kamnipaia Challam, Secretary LSCS hawa kut da e u ki kyntien sñiawngooh.
U Chawas Lyngdoh, Dolloi Elaka Raliang hawa e kyntien kam u kongsan da yaroh u ya ki dkhot ka Lei Synshar Cultural Society yei kitkhia yong ki wow pynman ya kani ka e sikai kyrpang ya ki khon khynroo khyllood ka Niamtre wa man chibynta yow sai u pynmih ya ki khynroo khyllood kiwa em i kitkhlieh ya ka niam ka rukom dustur haman ki chnong ki raij.
Chooh chooh kiwi ki waheh kiwa e kyntien sneiñ kyntien kroo wei e mynsien ya ki khynroo khyllood ha kani ka sngi toh u Shape Paswet, General Manager ka District Commerce & Industries Center kam u symbood kongsan, u Kamai Tyngkan, President Seinraij Nongkynrih wa u Nitajan Shadap Manner, Vice-President Lei Synshar Cultural Society.
