Jowai: Ki bor pynlai ka Seinraij LPS SSA Mukhap ha ka thong wow yohlaad ki khynnah u pynyoo pyntaw sap nalor i tip u thoh wei purae kot, ha ka sngi Hat 27 tarik hadooh ka sngi Khyllaw 29 u Wisu da pynman ki ya ka School Sports Meet heiwa hapyrdi i chimbynta chongchit, ka-it ki khynnah, ki bor pynlai ka skur nalor ki yakop phet ha madan da pynman ki leh ya ka Group Dancing Competition wa kiwi kiwi.
Ya kani ka School Sports dawan wow wai pyrda ha ka 27 tarik da u waheh chnong Mukhap katwa ha ka sngi pynkut won ka 29 tarik ya kani ka Sport dawan sakhilang leh da u Nujorki Sungoh, MLA kam u kongsan wei da pynhiar u leh ya ka lama kam ka dak i khang ya kani ka School Sports.
Ha ka yalang pynkut yong kani ka sngi kawa daman hapyrdi i sakhilang ki dkhot yong ka School Managing Committee wa ki bei ki pa yong ki khynnah, ka Kheinkor Niang, Head teacher da yeiñ ko wow e ki kyntien yahkhmat wa ki kyntien sñiawngooh yawaroh kiwa da ya embyntalang hei wow pynman ya kani ka School Sports kawa jop wei lai bait lai ryntih.
U Nujorki kam u kongsan, hawa e kyntien ha pyrdi ki khynnah wa ki lok ki jor wa wan sakhi, kdar u wow e i sñiawngooh wa khroo ya ki bor pait bor pynlai ka skur kiwa da ye u leh chiboon ki kaam neibynta i kaap wei lai ka skur cha khmat neitae wan kyrsu kyntu u leh ya ki manbei manpa deiwa ong kynmoo ha kani ka juk wa katni u mukhu wow e i ha ki khon ki kti yong i toh i stad i tip kamtæ dei sñiawkhia khutlang u ya ki manbei manpa wa kiwa chong chnong waroh wow yakrehlang hei wow pynman ya ka chnong ka thaw kawa lait nei em ya ki khynnah wym tip u thoh næ puræ.
Photos Contributed by S.D.Laloo
Discussion about this post