Jowai: Ha ka thong wow yohlaad ki khynroo khyllood wa ki khynnah u ya pynyoo pyntaw sap wei wow wanrah yei tæ i sñiaw wa yajan hapyrdi ki khon ka niamtre wa em hapoh ki thawaner ka Seiñraj Jowai, ki bor pait bor pynlai ka Khynroo Khyllood Committee da chimkhia ki wow pynman ya ka tayaw lehkmen wa kyrpang ya kawa da sdang nadooh ka sngi Musiang 21 tarik Duiatra wei da pynkut won ha ka sngi Khyllaw 26 tarik yong uni hi u bnai.
Ha ka chitayaw lynter yong kani ka lehkmen da sakhi wa ki khon khynroo khyllood wa ki khynnah yong ka Shlem Hikai Tynre yong ka dong Panaliar, Loomkyrwiang, Loomiongkjam, Dulong, Tpep-pale, Loompyrdi Iongpiah, Chilliangraij wa ka Umchaiar mih yachimbynta chongchit ki ha ki yakob waphær waphær.
Ki jait yakob kiwa da pynman ha kani ka tayaw lehkmen toh kam ka yakob rwai wa ka yakob chaad sur tre, ka khohpoit kawa man heiyatoh wa ka niam rukom, dustur, riti, ka yakob bha chynrang miat kynthai hapyrdi ki khon Khynroo Khyllood ka Seiñraij wa kiwi kiwi kiwa man chibynta ka tyngkong kyrpang ya ki khynroo khyllood wa ki khynnah wow ya pynyoo pyntaw sap, pyntaw buit, pyntaw bor.
Ya kani ka tayaw lehkmen da wan wow wai pyrda da u Deibormi Toi, SDO, PHE Amlarem Sub-Division kam u kongsan katwa ha ka sngi pynkut wan da khangpyrda da u E.M.H Passah, Treasurer Seiñraij Jowai hei sakhilang kiwi ki waheh wasian, manbei manpa.
Discussion about this post