Jowai: Ki bor pait bor pynlai ka Meghalaya Bharat Scouts & Guides, West Jaiñtia Hills District ha kani ka sngi Khyllaw 9 tarik Khonchonglad hapyrdi i bood ryntih ya ki adong ka sorkar da pynman ki i khangpyrda yei lehkemn leh warom wa chitayaw lynter yong ka Foundation Day kawa da sdang nadooh ka sngi Mulong 3 tarik u Khonchonglad.
Ya kani ka sngi dawan sakhilang da u Lucky Lyngdoh, Jt. Director of School Education & Literacy, West Jaiñtia Hills Jowai kam u kongsan hei emlang ka Saramai Tariang, District Commissioner Guides, West Jaiñtia Hills, District Secretary MBS&G, West Jaiñtia Hills u Ohiwot Laloo wa kiwi kiwi kiwa cha khut sniawbha.
Kam wa pynkynmoo ha ka 7 tarik u Khonchonglad da em i leh warom ya ka Foundation Day deiwa bood ryntih ya ki adong sorkar wei da em ka yalang watbian hei pynlai u District Organiser Scout West Jaiñtia Hills u Elvis Dkhar wei da yoh leh yei klam i khana pynsñiaw chaphang ka Scouts Guides Movement na ka Saramai Tariang, District Commissioner Guides wa na u Julius Lyngdoh, District Training Commissioner Scouts, West Jaiñtia Hills katwa ka Chwadaka Laloo, Guides Captain da e ko ki kyntien pdiang burom wei hawa kut wan u Adiam U Bthuh, Jt. District Secretary e u ki kyntien khublei.
Ha ka yalang pynkut yong kani ka prokram hei pynlai ka C. Susngi, District Training Commissioner Guides da yoh ya ki kyntien pdiang burom na ka Siami Shylla, District Organiser Guides, i khana yei lai luti kani ka tayaw lehkmen da u Jt. District Secretary MBS&G u Adiam U Bthuh katwa ka C. Pakma , Unit Leader hawa kut e ko ki kyntien sñiawngooh.
Ka Saramai Tariang hawa e yei klam ha kani ka prokram da pynkynmoo ko hapyrdi ki dkhot waroh yei emkaam wow bood u ksooh ya ki yurim sikai yong ka Bharat Scouts & Guides Movement wei da kyntu joor ko leh ya ki khynnah Scout- Guide deiwa ong e wa i kmen i ka-it wa da yoh phi ha kini ki chitayaw lyngba ki yakob waphær waphær u saiñdur saiñdar phi ki heitæ i rukom iwa miat wa bha wei e myntoi leh ya ka imlang sahlang.
Ya ki Prize cha ki Scout- Guide, Rover-Ranger wa ki Guide Captain kiwa dajop ha ki yakob waphær da saam da u kongsan wa kwi kiwi ki dkhot ka Bharat Scouts & Guides.
U Lucky Lyngdoh chwa wow pynbna i khang pyrda ya kani ka Competition Week da e u ki kyntien dei wa niawtang ya ki kaam wabha yong ka Scouts- Guides Movement hapoh ka District hei wow chakri wei yarap ya ka imlang sahlang ha kiwon kiwon ki por khamtam hei por wa em i jia wym poi pyrkhat iwa man i tynjooh wa khroo ya ka imlang sahlang.
Halyndet kini kiyi kiyi ki kaam wa miat wa bha yong ka Scout-Guide Movement, e u leh i kitbok kitrwiang ya kani ka seiñ kamjooh ya ki dkhot yong ka waroh yow nang ye ki u kaap u lai chakhmat wei u imsngi chooh chooh ki u leh yei wa miat wa bha tam neibynta i burom ka District, ka ri wa ka jaitbru.
