Khliehriat: Kam chibynta wow pynneh pynsah ya ki khloo kamjooh leh ya ki mrad kiwa dang em ha khloo, ka Biodiversity Management Committee Byndihati (BMCB) da chimkhia ko wow ri wow sumaar yaka khloo Bri Syiem wa ka khloo Umsngat kiwa em haka chnong Byndihati kiwa man leh ki khloo chnong.
U ma Hambertus Nongtdu, Chairman ka BDMB da ong u wa ha kani ka khloo dang em ki mrad kam ki skai, ki sniang khloo, ki khla, ki sim wa boonjait, ki rasang, ki myrsiang wa kiwi kiwi kiwa emkaam sakhiat u yada. Chooh chooh ka Committee kwah ko u pynneh pynsah ya ki phlang ki rnem kiwa man dawai kynbat yow lait ki u wiar jait.
Da chem leh ya kawi ka wah khian hapyrdi kini ki khloo kawa khooid heiwa ki dakha dang em ki, wei kyrmen leh wa nei em kini ki khloo daw neh wei daw roi ki mrad.
U ma Bruno Shylla, Rangbah Chnong ka Byndihati da ong u wa ka Committee thmu ko wow pynman ya kani ka thaw kam kawi ka thaw wa ye u leh ya ka Eco Tourism, kamjooh leh kam chi bynta wow pynneh pynsah yaka rymaw, heiwa da ong u wa i em kini ki khloo wa rben yarap ko chiboon heiwow pynmih ya ka lyær wa khooid.
Ka BMCB da mana ko wa ymhoi de u pam dieñ na kani ka khloo, wow siat mrad kiwa em ha kani ka khloo næ u thang diñ khlemakor næ u pynjakhlia ya kani ka wah wa khian. Lada chem ya kiwon kiwon kiwa leh pyrchah yeini ki dkhot ka Committee daw ujor pyrchah ko cha ki dkhot ka Biodiversity Management Committee Byndihati kiwa kynthup ya u ma Hambertus Nongtdu kam u Chariman, u ma Yes Shylla kam u Secretary wa ki dkhot ka Executive Committee kiwa kynthup ya u ma Bruno Shylla, u ma Patrik Pala, kong Thilda Nongtdu wa ka kong Margret Shylla.
Discussion about this post