New Delhi: Ka chnat chipai Indian Air Force (IAF) katni da angnood bha ko wow sdang u pynemkaam noh da ki tiar kiwa da chna pyn hapoh ka ri khamtam chwa wow thied chooh ko sa 21 tylli ki lieñsuiñ yapam MiG-29 na Russia wei wow pyndait ha ki ya ki naamdiñ Astra Air-To-Air Missile.
Katkam i ong ki heh ka chnat kaam yada ri (Defence), da ong wa i thied ya ki 21 tylli kini ki lieñsuiñ yapam kamwa da tyrwa hakhmat ka Defence Acquisition Council, ka IAF kwah ko wow pynku kyrdan ya ka MiG-29 kiwa da pynemkaam chwa ka ri katni.
Da ong wa ha kini ki lieñsuiñ ka IAF kwah ko wow pynemkaam da ki tiar siat wa da chna pyn hapoh ka ri kiwa kynthup ya ki Astra Missile.
Katkam wa man katni ki lieñsuiñ yapam MiG-29 man ki kiwi na kiwa miat tam ha ka pyrthai.
I kwah ka IAF wow pynemkaam da ki tiar wa pynmih hapoh ka ri da em i da slem wei da pynksan chooh chooh yeini da u khlieh kani ka chnat chipai, u RKS Bhadauria uwa da kam wow chimkti chooh ya ki Light Combat Aircraft Tejas wa chna ha ka ri wei da angnood u leh wow pyndep noh ka ri wow chna ya ki Fifth Generation Advanced Medium Combat Aircraft.
Ka chnat chipai duriaw ka ri namo ka Indian Navy leh pynemkaam ko ya ka MiG-29 ‘K’ wei man ko du ka hi kawa pynemkaam ya kani ka lieñsuiñ yapam wa da chna kyrpang ya ki chipai duriaw hapoh ka pyrthai waroh kawi.
Discussion about this post