Jowai : Ka JSU- Mynso Unit lyngba u President yong ka u Lawyer Son War da pynsñiaw ki yei diaw mynsien ki hei yatoh wei ym em doctor wa sah ha Mynso PHC.
Ka seiñ ong ko wa ka seiñ da yoh ko boon ki ujor na ki wa chong chnong yong kani ka thaiñ wa ym em doctor kamjooh kiwa kreh wa sah ha kani ka PHC khamtam ha ka sngi Chohthat wa ka sngi Bibar.
Ka JSU da kynnoh ki leh wa ka doctor wa pait ya kani ka PHC ka Dr. Easter Lyngdoh da phah yang ko da ki chowkidar kani ka PHC ha kini ki sngi wei kamjooh leh ha ki sngi pohyaw neidaw wa ym em doctor wa sah ha kani ka PHC.
Chooh chooh ka seiñ da ong ki wa heipor wa lai thooh doctor ki paidbah manda chem ki wa ym em doctor da pyrchang ki u phone ya ka doctor tangwa ka phah ko ya ki u lai chah sumaar cha ka Civil Hospital wa em ha Ialong.
Da ong leh wa kiwa kreh yong kani ka PHC ym em biang por ki, wei wan kreh ki 11 waje i step cha neiñ wei kieh 12:30 pyrdi sngi da lai liwan wot ki.
Kamtæ ka seiñ kwah ko i pynche na ki arngut ki doctor wa em ha kani ka PHC ka Dr. E. Lyngoh wa Dr. L. Rymbai yei daw wa pynman ya ki wa ym sah ki ha kani ka PHC. Heijooh i por leh da kylli wa ki chowkidar ye ki ne ym ye ki u e dawai ya kiwa kjut.
I leh ym em doctor mo wa pait ya kani ka PHC wa yoh kiwa kreh u lai u wan katwa ngait. Ym em wa kjut mo ha ka sngi chohthat wa ka sngi Bibar?
Kamtæ ka seiñ da kyrpad cha ki bor wa ha neiñ yow chimkhia ki ya ini i eh i khoo wa chem ki paidbah ha kani ka PHC.
Discussion about this post