Ka seiñ HITO da thoh ko cha u Montri Rangbah ka jylla, u Conrad Sangma yow dawa thung kreh hanla da ka Contract ya ki Physical Education Teachers (PET) wei kamjooh ki Coach ha waroh ki skur sorkar wa ki yong ki bru samen kamjooh ha ki College ka Meghalaya yow ye u pynmih ya ki khloor yalehke kiwa ye u jop hapoh ka ri kamjooh ha ki Olympics.
Ya ini da dawa hadien wa chem lyngba ka RTI wa da yaleh hapoh ka chnat puræ puthi wa man ko mar dei khangtleiñ yei thmu ka National Education Policy kawa da pynbna ha u 2020 wa ha ka Meghalaya Sports Policy kawa da pynbna ha u 2019.
Ka seiñ da ong ko leh wa u Montri Rangbah hawa klam ha ka sngi laitlooid ka ri da booh thong u wow em kiwa napoh ka jylla ki wow yoh u lai chimbynta ha ka Paris Olympics ha u snem 2024.
Hajrong ini ka seiñ da ong ko wa lyngba ka RTI da em du soo ngut ki PET ha waroh ki skur sorkar ka jylla wei na kini ki soo ngut, du ar ngut kiwa biang ka kyrdan heiwa ka sorkar won da ong ko neidaw wym dap poisa ym ye wow wanrah ka ya ka Physical Education kam ka Subject hapoh ki thaw puræ. Wei waroh ki kreh kam ki PET da kyrriah noh ki cha kiwi ki Subject.
Chooh chooh da ong wa lyngba ka RTI da chem leh wym jooh em yoh yarap poisa na ka sorkar neibynta ki yalehke Sports.
Ka seiñ da ong ko leh wa hapoh ka Meghalaya Sports Policy 2019 da kdaw che yei emkaam wow pynchlur ya ki yalehke Sports, wow pynbiang ya ki thaw yalehke, ki Coach, ki Physical Education Teachers wa kiwi kiwi de.
Kamtæ da kyntu ya ka sorkar wow chimkhia sakhiat ya ini i thong wa da booh pyn da ka sorkar hi.
