Ynne ka sngi hadien wa wan pait u Montri ka chnat Arts & Culture ka jylla, u Sanbor Shullai ya ka District Library Auditorium ha Mynthong Jowai neiliang ka Synjuk Waheh Chnong Jowai wa ka seiñ Jaiñtia Students Union da e khublei ki ya uni u Montri hajrong i chimkhia yong oo.
Neiliang u Secretary ka Synjuk, u Rq. Riquoma Laloo da ong u wa ka Synjuk da booddien ko ya ini i kaam wa yatoh waka District Library Auditorium nadooh u snem wa dadep wei da booddien leh yeini wa u Deputy Commissioner ka West Jaiñtia Hills District.
Da ong u wa ha ki sngi wa dadep da sakhi wa i kreh wa i chna pynmiat ya ka Auditorium da man iwa sdang wei da e khublei u ya u Montri ka sorkar jylla, u Sanbor Shullai wa da wan booddien u yeini ynne ka sngi.
U Riquoma da ngait skem u leh wa ka Synjuk chirup wa ka JSU daw ye ko wow pynphet ya ini i kaam chakhmat.
Neiliang u Secretary ka JSU, u Treiborlang R. Suchen da ong u wa ya kani ka District Library Auditorium da pynwandur ha u 1987 heipor wa yahkhmat u Garland Rymbai ya ka seiñ wei kani ka yung da em ko palat 30 snem i rta, heiwa da pynman ya ki yalang kiwa har rukom wei katni ymye de wow pynman yalang ha kani ka yung.
Da ong u wa ynne u Montri da kular u da i yung wa thymme neibynta ka District Library Auditorium wei da kwah wa kani ka yung thymme u man ko kam kawa da chna ha Tura wa ha Shillong.
Heijooh i por ka JSU da kyrpaad ko ya ka sorkar wow booh noh ya kawi ka District Library ha Khliehriat, East Jaiñtia Hills, neibhah kani man ko kawa emkaam bha ya kani ka District.
