Hadien wa ka Delimitation Committee ka Jaiñtia Hills Autonomous District Council (JHADC), da pynbna paidbah ko wow sdang pynman noh ya ki Public Hearing nadooh ka 8 tarik uni u bnai ha ki le tylli ki thaw ka Ri-loom Jaiñtia heiyatoh wa i tyrwa kyrriah ya ki chnong na kawi ka MDC Constituency cha kawi won.
Ynne ka sngi ki 4 tylli ki chnong wa haap hapoh ka Raij Moobakhon, West Jaiñtia Hills District da pynman yalang jhan ki ha chnong Moobakhon yow pynsñiaw i pyrchah joor hajrong i chah kyrriah ki neiwi cha kawi won ka Constituency.
Ha kani ka yalang da emlang ki dkhot Executive Committee wa kiwa ksoh kaam yong waroh 4 tylli ki chnong kynthai wa chynrang wa kynthup ya ka chnong Ksehrynshang, Moobakhon, Nongmulieh waka Sehlama Nongthymme kiwa da ya chimbynta leh u ya klam e yumut hajrong kani ka phang.
Neiliang ki 4 waheh chnong wa kynthup ya u Malbi Timung, u Pros Dkhar, u Merry O Rymbai wa u Will Lamare ong ki wa waroh chi kattu kini ki chnong haap bait ki ha kajooh ka Constituency, tangwa katni won da rah noh ya ka Sehlama Nongthymme cha Mynsoo Nongjngi Constituency katwa ya ka Moobakhon, Nongmulieh wa Ksehrynshang da kyrriah noh cha Wahiajer Kyndong Constituency.
Ong haroh ki wym em pyrchah ki yei phiah Constituency tangwa kwah ki u emlang wa ki chnong wa marjan kiwa da ya imlang ha kiwon kiwon ki kaam la sñiawbha næ sñiawsih.
Tangwa kamwa man kattæ won i rukom kyrriah ya ki chnong man i wym ye u pdiang neibhah ki chnong wa haap ha ka jooh ka Constituency da ya jngai bha ki kawi na kawi won.
Kamtæ lyngba ka yalang chim ki ya ka rai wow lai booh ujor cha ka Delimitation Committee ka JHADC, wei la jia wa ki bor wa hakhlieh wym ap wym sñiaw ki, ye ki u chim da kawi won ka rai wot u dam lai thap Vote leh ha ka Election wow wan.
Discussion about this post