Hadien wa da mih i kynaad ynnin ka sngi hapyrdi kiwa chong chnong ka Khanduli wa ki Karbi ka West Karbi Anglong District ka Assam, ynne ka sngi neiliang ka Dorbar Chnong Khanduli da pynman ki ya ka yalang paidbah ha Khanduli heiwa da wan chimbynta da ka Dorbar Chnong Lapangap, ka Dorbar Chnong Umplu, Dorbar Chnong Siatsama, Dorbar Chnong Saitsama, Dorbar Chnong Namdong wa kiwi deilang wa ki seiñbhalang waphær waphær heiwa da chim ya ka rai wym hoi de u em ka ya dai ya thied wa ki Karbi wei lada ki Karbi bien ki, kwah ki wow yasuk biang yow ye u ya lai ya wan kamwa jooh.
Da kyrpaad leh ya ki Pnar wa em ha ka chong wow man ki kiwa yatylli lada em iwon iwon i jia.
Neiliang ka KSU West Jaiñtia Hills District Unit deilang waka Namdong Unit da kyrchaan pura ki ya kani ka rai wa da chim ynne ka sngi kat wym pu wan i yasuk, kamtæ da kyrpaad ya ki paidbah wow ya ksohkti lang ki dei wym toh u ya lai ya wan wei wow khayi pateiñ wa ki Karbi kat wym pu ye u pynbait ya ini i kaam.
Neiliang won ka seiñ FKJGP West Jaiñtia Hills District da ong ko wa iwa jia ynnin toh deiwa wan ki nong Karbi cha ka thaw rep ki Khanduli heiwa da pynkulmar wei da choh da dat ki ki kini ki warep ka Khanduli kiwa da pyntip cha kiwa chong chong kiwa da mih paidbah yow lai kdong ya kini ki Karbi.
Kamtæ da ong wa da pynman ya kani ka dorbar neidaw wym kwah ki u pteiñ kani ka kulmar wei wow wanrah noh ya ka chongsuk chongsaaiñ lada bien ki Karbi khamtam ha kini ki por wa chwa u lai rep.
Heijooh i por da ong wa i rai wa nachwa wow khang yei lai rep waka kamai kajih wa ki Karbi u man ko kawa dang neh hi wot ya kitu kiwa na kiwi ki chong kiwa lai khayi pateiñ wa ki Karbi wow sñiawbha ki wow ya krehlang wei lada em kiwa leh pyrchah ym em i bahkhlieh ya ki.
Hapyrdi ini i man dorbar da em wa thang ya kawi ka yung trep wa da suba wa leh da ki nong Karbi heipor kamwa 3:00 waje i sngi.
Puræ leh: Mynsoo uwi u nong Karbi hadien wa chah dat ha ki Khanduli
