Ka chnat District Council Affairs (DCA) deilang wa ki le tylli ki District Council da yatai sani bha ki heiyatoh wa i pynkrehkaam ya ka aiñ chna yung namo ka Building Bylaws, wei kamwa da pynneh yei rai yong u snem 2019, kiwa ye wow pynkrehkaam ya ka aiñ chna yung toh ki District Council waka Meghalaya Urban Development Authority (MUDA).
U Symbood Montri Rangbah wa pait ya ka chnat DCA, u Prestone Tynsong da ong u wa ki District Council ye ki wow pynkrehkaam ya ka Building Bylaws cha baar na ki thaw yong ka Municipal wa ha ki kattu katni ki thaw wa da tipmit kyrpang, katwa ka MUDA daw pait lang ko ya ki thaw wa em ki karkhana, ki yung wa heh kam i chna ya ki Hotel wa kiwi ki thaw krehkaam wa heh.
Da khana u wa ki District Council da pynsñiaw ki cha ka sorkar wa ki kwah bait ki wow pynkrehkaam da ka aiñ chna yung yong ka Council, ha waroh ki thaw wa man kam ki Schedule Area wa kynthup ha ki thaw sor, heiwa da ong u wa i e yumut ki man iwa biang neibhah lada pynkrehkaam salonsar ya ka Building Bylaws, daw wanrah i chngaaiñ yei chna waroh khamtam wa ka Meghalaya toh ka jylla kawa khih khmi.
U Prestone da ong u wa hajrong ini i e yumut, neiliang ka chnat DCA da rai ko wow chna ya ka Committee ka wow pait wei bichaar bniah wei kawa daw khlieh da u Secretary ka chnat Urban Affairs yow pait bniah biang ya ka aiñ lada emkaam wow wanrah yei pynkylla, wei ki dkhot hapoh ka Committee daw emlang leh na waroh le tylli ki District Council wei kamjooh ki sahep yong ki chnat wa emkaam.
Kawi won ka phang wa da rai toh hajrong i Register yei thaw, wei hajrong ini daw chna leh sa kawi ka Committee wow khlieh da u Secretary ka DCA deiwa em ryngkat wa kiwi ki dkhot yow pait wei puræ bniah bha ya ka Indian Registration Act kawa da pynkrehkaam ha ka jylla.
Discussion about this post