Ka Revolution Ïada La Ka Ri ynne ka sngi da ong ko wa ka MeECL ya kawa da jooh tip kam ka MeSEB, da sdang ha u 1974 wow pynbiang bordiñ hapoh ka jylla wei ini da man i iwa krehkaam bha hadooh wa sdang ki snem 90 khlieh tangwa katni da sah ko su ki ram wei ymye de ko wow pyndap yeiwa emkaam hapoh ka jylla iwa da pynbor ya ka sorkar wow thied bordiñ na ka NEEPCO wa kiwi kiwi.
Ha ki sngi wa dadep da mih pyrthai ki kaam hapoh ka MeECL wei da sakhi leh ya ki yakhih na ki wakreh yong ka heiwa da kylli ya ki rukom krehkaam kani ka chnat iwa da pynbor ya ki seiñ wow pynartatien yei rukom krehkaam yong ka.
U Ardent Miller Basaiawmoit uwa man u Convener ka Revolution da ong u wa da sakhi yei yakdaw kti iwi ya iwi hapoh ka chnat iwa da pteiñ hadooh katni.
Da ong u wa kam ki paidbah wa em i sñiawkhia, kwah ki wow tip yi wa emkti yeiwa man ka MeECL hadooh katni. Da ban u leh ya ka sorkar wow thung da ka takit wa laitlooid heiyatoh wa ki kaam hapoh kani ka chnat, khnang wa ka takit u man ko kawa lai bait emkaam ya u montri ka chnat wow hiar chuki noh u.
U Ardent da yaroh u leh ya u Dr. Jemino Mawthoh uwa man u General Secretary ka United Democratic Party, uwa da dawa hiar chuki noh ya u James Sangma kam u montri ka chnat bordiñ deiwa kyntu ya u Jemino wa ka UDP wow booddien wei wow chimkhia hajrong kini waroh.
