Jowai: Kiwa hayung yong ki 15 ngut kiwa chah kset hapoh krem mooyong ha Ksan, East Jaiñtia Hills hadien wa da pait ki yei Video ha ka 17 tarik uni u bnai yong i metyap wa chem ka ROV ki chipai Indian Navy hapoh i krem mooyong da pynsñiaw ki wa kwah ki wow sai bait ya ini i metyap hanlada man i iwa da pyud.
Kini kiwa hayung kiwa na Lumthari wa na Chirang, Assam da kyntu ki wow sai yei metyap deimiat katwa ye khlem pyntlor yei doh i pran.
Neiliang won ki chipai ka Indian Navy dang pyrchang ki wow sai yei metyap deiwa pynemkaam ya ka ROV hadien wa da pyrkhat liang wanang wei hadien wa pait ya ki dur wa dep chon yong ini i metyap da ong ki wa man i iwa eh wow sai ya i metyap khlem pyntlor ya i doh i pran.
Hanla kattæ leh hadooh ynne ka sngi dang pyrchang hi wow sai ya ini i metyap.
Da pyntip leh wa i metyap wa da chem hapoh i krem toh yong u bru wa sap ya ka patlun Jeans rong bneiñ (blue) wa ka sula (T-shirt) rong soo.
Chooh chooh da pyntip wa ya i metyap ye u tipmit lyngba ka sahkti, kabot wa kiwi kiwi, wei da khutlang leh ya kiwa hayung hasem na ri-loom Garo wow wanlang ki ha kini ki sngi.
Ha iwi tawon i liang ka Indian Navy ynne ka sngi dang pynkrehkaam hi ko ya ka kor ROV wa em kiwa chah kset.
Ka CIL won dang pteiñ hi ko wow taan um na ki ar tylli ki krem mooyong warim kiwa da pynkrehkaam 22 kynta kawi ka Pump hadooh 5 waje ynne i janmiet wei da sai ya ka um wa 4989600 liter.
Ka Planys Chennai Technology dang pteiñ hi ko wow pynemkaam ya ka kor ROV ha ka krem mooyong wa soo (Shaft No. 4) yow chem chooh chooh ya ki thlu paar mooyong kiwa da dep chem chwa ko.
Ka Company KSB nadooh wa krehkaam ka Pump yong ki ynnin ka sngi hadooh ynne ka sngi 5 waje i janmiet, da sangeh ki 4 kynta wow thap phniang wei waroh da sai um ki 3960000 liter.
Da yarap lang ya ini waroh da ki dkhot ka NDRF kiwa da em nadooh wa sdang.
Discussion about this post