I yatai hajrong ka mang tyngka hapoh ka yung dorbar ynne ka sngi da pynman ko ya ki MLA wow dawa pynjrong yei por wa da e u klam ki neibhah 7-8 minit da duna ware i.
Neiliang u MLA ka Amlarem, u Lahkmen Rymbui da yieñ u wow kyntu ya u Lamphang ka yung dorbar, u Thomas Sangma wow e tang 15 minit samen neibhah kani toh kawa emkaam bha hawa ka mang tyngka kawa da wanrah dapoi ko hadooh lephaw hajar klur.
U Lamphang won da e jubab u wa ynne da em 30 ngut kiwa da e pyrtuid kiwa kwah wow klam wei da hap wow e laad ya waroh deiwa booh dei por wa ye ki u klam. Deiwa pynkynmoo leh wa ha ka 7 tarik wot ya uwi na ki dkhot ka liang pyrchah da e laad wow klam u hadooh 30 minit tangwa iwa sñiawsih wa boon ki chuki toh kiwa thylli ha katu ka sngi.
Da ong u leh wa ynne da booh ar kynta chiteiñ yow yaklam myntu ka sngi.
Neiliang uwa yahkhmat ka Liang Pyrchah, u Mukul Sangma leh da yieñ u wow ong wa emkaam bha ya ka yung dorbar u pait bniah ko ya ka mang tyngka wei i 7 minit i 10 minit ym yahaap ko wei chwa wow khut pynman ya ka dorbar, neiliang ka Business Advisory Committee leh dadep yaklam wow e por lada ym ye wow pyndep.
Tangwa neiliang u Lamphang da ong bait u wa oo daw bhah u yei por katkam wa emkaam neibhah dadep leh wow e por 5 kynta wow yaklam ya kani ka mang tyngka nadooh ka tayaaw wa dep.
Neiliang won u Montri Rangbah, u Conrad Sangma leh mynjur u wow pynjrong yei por kamjooh neibynta yong oo leh manda jubab u deiwa kyntu leh ya kiwi ki dkhot wow emlang ki hawa e u yei jubab.
Discussion about this post