I yakhih ki tre kamjooh kiwa yah Truck hapoh ka lama ka Meghalaya Commercial Truck Owners and Drivers Association (MCTODA) heiyatoh wa ka bai kit Cement wa Clinker na ki karkhana Cement na East Jaiñtia dang pteiñ i hadooh ynne ka sngi.
Hawa kylli na u Chief Minister, u Conrad Sangma heiyatoh wa ini i yakhih wei i dawa ka seiñ wow pynlait ya kiwa yahkhmat ka seiñ, u Conrad da pynche u deiwa ong wa heiyatoh wa ini i kaam ha kini ki sngi wa dadep da em bait u cha baar, cha Ri-loom Garo wei ymtip ware u heiyatoh wa ini i yakhih.
Da ong u wa u Deputy Chief Minister wa pait ya ka chnat Home, u Prestone Tynsong da pait u yeini i kaam heiwa da e ktien u langer heiyatoh weini wei neiliang ka sorkar leh yieñ ko ha ka yurim wa klam u Prestone.
Chooh chooh u Conrad da ong u wa ym bien ware u klam hajrong ini neibhah daw hap yaparom u wa u Prestone heiyatoh wa ini tangwa kwah hi u wow bait noh ini i kaam wow myntoi kiwa boon.
Da ong u leh wa ini i kaam man iwa jwat heiwa da jooh sakhi yeini nachwa leh wei da ngait skem u wow ye u pynbait ki chnat ya ini i kaam ha ki sngi wow wan.
Discussion about this post