Uwa yahkhmat ka Liang Pyrchah ha ka jylla uwa man leh u Montri Rangbah warim, u Dr. Mukul Sangma da lung mynsien wei ki umkhmat da kyan ki hawa klam u hajrong i yatylli ki jaitbru ha ka jylla.
Hawa yaklam wa ki laad pathai khubor ynne ka sngi, u Dr. Mukul ym ye u wow lait nei klam kajiak, tangwa da yoo ya ki umkhmat wa da kyan, wei da ong u wa ha ki duwai yong oo barabor da duwai u ha u Blai wow pynyatylli ya ki jaitbru ha ka jylla.
Da ong wa i eh ha ka jylla Meghalaya toh wa ki bru na ki seiñ saiñpyrthai ym pu ye ki wow pynyatylli ya ki jaitbru iwa kongsan bha ha ka jylla, lada toh da ka Congress næ kiwi ki seiñ saiñpyrthai wow pynyatylli ya ki Khasi, Jaiñtia wa Garo, heiwa da ong u leh wa lada toh da uwon uwon uwa yahkhmat leh, da em bait itæ i ya klamsiaw wow yalap deiwa ong ileh du da u Garo wow man Chief Minister, ileh du u Khasi wow man Chief Minister, wei ileh ym man sa utæ lane utæ.
Uwa yahkhmat ka Congress da ong u wa ka jylla Meghalaya u ku ko du lada waroh ki jaitbru u yatylli ki, wei kamjooh leh kiwa chong chnong ka jylla ym toh du deiwa kut du hei sñiaw jaitbru, deiwa pynrap wa emkaam wow wanlang heijooh ki Khasi Garo wa Jaiñtia.
Chooh chooh u Montri Rangbah warim da ong u wa man i iwa emkaam wa ki paidbah wow tip ki yei kordor wow man kiwa kitkhlieh hawa jied ya ki bru ki wow man kam kiwa synchaar, neibhah da em kiwa chim ya ka rai wa bakla, næ wa em kiwa wanrah ki kulmar ha ki kaam synchaar ka sorkar, kiwa ktah yei im yong waroh kiwa chong chnong wei kamjooh ya ki pateiñ wow wan.
U Dr. Mukul da ong u leh wa katwa dang jan cha ka Election 2023, kwah u wow ong wa kiwa chong chnong toh u man ki kiwa kitkhlieh hawa pynemkaam ki yei hok yong ki, neibhah i hok yong ki ym toh du neibynta samen samen, tangwa toh neibynta yong waroh kawi ka jylla.
