Ka Union Health Ministry lyngba ka Directorate General of Health Services (DGHS) du hapoh chi sngi wa da pynbna da ka Prof. (Dr) Sunita Sharma kam ka Director wow khang noh ya ki Physiotherapist wow pynemkaam yei kyrdan Doctor deiwa thoh ‘Dr.’ hakhmat i pyrtuid ki, da pyndam noh ya kani ka hukum.
Ha ka chithi wa pynmih nyngkong da ong wa du kitu donhi kiwa man kam ki Doctor yong ka Modern Medicine deilang ki Ayurveda, Homeopathy wa Unani kiwa ye wow thoh ‘Dr’ hakhmat i pyrtuid ki katkam wa da chah da ka aiñ.
Ya kani ka hukum da pynmih nyngkong neidaw wa ka Indian Association of Physical Medicine and Rehabilitation (IAPMR) da kdaw ko ya kiwa boon ki hukum ki yung bichaar yow khang ya ki Physiotherapist wow kam ki ya idæ kam ki Doctor.
Ka Director General of Health Services da pynmih ko ya ka chithi thymme wa da pyndam noh ya ka hukum wa da pynmih chwa neidaw wa da em kiwa boh yeini wei daw hap chong puræ bniah yeini waroh.
Da iwa pyndam ya ka hukum wa da pynmih chwa mut i wa ki Physiotherapist ye ki wow pynemkaam biang yei ‘Dr’ hakhmat i pyrtuid ki.
Ini waroh da sdang i neiwa pynmih ya ka Competency Based Curriculum for Physiotherapy-Approved Syllabus 2025 wa da pynmih da ka National Commission for Allied and Healthcare Professions (NCAHP) hapoh ka Health Ministry.
Hapoh kani ka Syllabus da tyrwa wa ki Physiotherapist ye ki wow pynemkamm ya i ‘Dr,’ nakhmat wa wa PT hawa kut i pyrtuid.
Neiliang ka IAPMR da pyrchah ko yeini deiwa ong wa ki Physiotherapist ymtoh kiwa da chah sikai wow man kam ki Doctor wei ymtoh wow chah u pynemkaam ki yei ‘Dr’ neibhah wa daw yahbkla ko ya ki paidbah.
Najrong ini da em leh ka bichaar da ka Patna High Court ha u snem 2003, ka Bengaluru Court ha u snem 2020 wa ka Madras High Court ha u snem 2022 kiwa da khang ya ki Physiotherapist wow khut ki ya idæ kam ki Doctor. Neiliang ka Tamil Nadu Medical Council Advisory leh ha u 2016 da man ko pyrchah yei wow pynemkaam ki yei kyrdan ‘Dr’ hei pyrtuid ki wei toh u kheiñ ki kam ki Paramedics næ ki Technician.
Discussion about this post