Ynne ka sngi toh ka sngi wow pynman ya ka Public Hearing namo ka pynsñiaw paidbah wa da pynman da ka Meghalaya Pollution Control Board (MSPCB) neibynta ka Meghalaya Cements Ltd. (Topcem) Thangskai, East Jaiñtia Hills heiwa kani ka Public Hearing toh wow pynheh ya kani ka karkhana, wow pynku yei pynmih khyndaw-bilat wa Clinker wa kiwi de.
Manda poi ha Thangskai ha i thaw wow psiah cha kani ka karkhana da khang luti ya ki paidbah kiwa wan na Wahiajer Narpuh wa pyrchah ya kani ka Public Hearing wei hadien kattu katni por da psiah yabor ki cha ka Gate wow psiah cha madan pynman Public Hearing heiwa da khang luti ki pulit ya kini ki paidbah wei da tympdung ya u Tear Gas tangwa da em won ki kattu katni kiwa da kaap najrong kynroh wow lai cha ka madan.
Hadien wym ye de ki pulit u khang, da yoh wow psiah kiwa em da ki spah ngut kiwa da lai ki cha madan wa da chna dara wei da tympiah tympra ki ya ki chuki ki miej wa kiwi kiwa em ha ini i thaw wei da bood won sa kiwi ki paidbah wa pyrchah kiwa dapoi lang waroh cha kani ka madan.
Hawa yaklam wa kiwa pyrchah da ong ki wa da e rieh e tooh ya ka NOC khlem tip ki paidbah wei i daw hi wa pyrchah ki toh wa i pynheh ya kani ka karkhana daw ktah chooh i ya ka la’ær wa ki um ki wah.
Heini da em leh i yania wa ki pulit wa ki paidbah kiwa da emlang leh wa ki khynnah heiwa ki pulit da maham ki wa ymtoh u pynthut ya ka Public Hearing wei i leh yong ki paidbah man i pyrchah ya ka aiñ wei da maham ya ki wa ymtoh u leh iwon iwon neibhah kam ki pulit toh i kaamram wow pynneh yei suk i saiñ.
Rap kattu katni por da kyrriah ya kani ka Public Hearing na madanbol cha Community Hall ka karkhana heiwa da pynlai bait ya ka wei mar ya tip yeini ki paidbah da mih ki bub na madan heiwa da tia ki cha kani ka Hall tangwa da chah khang luti ki ha ki pulit.
Heini da mih i chrai iwa da poi i ya kujai i yakura hapyrdi ki paidbah wa kamjooh i sympat lathi ki pulit heiwa da tympdung leh ya ki Tear Gas wa ki Stun Grenade heiwa ki paidbah da yut ki chirup i pakhot moo ya ki pulit, katwa ki pulit da tia bait ki chaphrang wow beh ya kini ki paidbah iwa da man lakam ka madan thma.
Ha ini i jia da mynsoo i takha ki paidbah kamjooh ki pulit.
Discussion about this post