Da: U Chandame Sungoh
Kani ka Nan Kachari em ko hakhap ka yung krehkaam u Deputy Commissioner, Jowai waka yungmane yong ka Balang Unitarian Jowai, harood u sarokbah National Highway (Jowai-Dawki). Kani ka nan em ko hapyrdi ka sor Jowai, kamtea kamwa man ka sor Jowai ka yit durkhmat yong ka Ri-loom Jaiñtia tæ kani ka nan leh da man ko kamtæ hi. Kani ka nan nachwa toh ka yong ka Kur Dkhar, Jowai wei hadien won dei ya sñiawthooh yumut tæ e ki cha ki bor District ka West Jaiñtia Hills wei da khut noh ki ka kam ka Nan Kachari. Hajan kani ka nan em i thaw thang sati ka kur Dkhar Jowai wei da emlang leh ka Park namo ka thaw chongke wa da pynlai daka chnat Forest heiwa u chowkidar, kiwa mali wa kreh heini da yoh ki yaka tulop na kani hi ka chnat sorkar.
Lada pait i narood sarok na DC Office ha laad wow lai cha SP Office hadooh Stand War i rukom kær ya kani ka nan toh iwa miat wei skem bha. Ki bru wa lai wa wan da chitom ki wow noh wat i snop diñkot leh. Lada pait i yeini, kani ka nan toh u man ko kawa khooid. Tangwa kamwa da yoo lang i waroh katni man ko kam katea ka Septic Tank næ ka thaw pynlang um jakhlia. Lada pait phi yaka um yong ka yoo phi du i yong lati wei tngit wei jakhlia ym ye de tang u batai leh.
Manda pait bha yei daw wa pynman ya kani ka nan kamni tæ em artylli ki daw. Kawa nyngkong toh na u dooid wa em nadien ki dukan wa em ha Stand War wa na kawi ka Hostel wa em hajan kani ka nan kawa ye u man yong ka Balang Unitarian. Lada pait i yei rukom lati ka um leh yoo bait i wa toh i yong phniang yong khleiñ wa kai wa tooid deiwa sait pliang sait kchu.
Ha kani ka nan em chiboon ki dakha heiwa ki bru kiwa jooh lai ke ha kani ka Park jooh brait chana brait muri ki tæ pait ki yeiwa yaknieh baam ki dakha. Yoosuk sakhiat u pait, ki khian najrong najrong, ki heh napoh napoh. Tangwa yoo wyr-ai yaki pli kini ki dakha, neibhah manda joor palat wa tngit ka um tæ ym ye ki pli u im. I heh kani ka nan jan ym duna yaka 5000-6000 Sqft kamtæ ye u em chiboon bah ki dakha.
Ha kawi ka sngi, katwa dang chong ke O harood kani ka nan em ar ngut ki Tourist kiwa wan napoh Haryana kiwa ya paitke wa mih ki dakha wa em kiwa noh baam, heitæ i por da yaklam ki para ki wei da ong ki, “Deiwa em kani ka Park wa kani ka nan wei boon dakha kamni tæ yoosuk wei yoo pyngngaad bha u pait lada man ka um haka ka nan kawa khooid. Han lada khian ko leh lada khooid ko tæ em hi i yoosuk kamwa ong ki, Small is beautiful”. Nga ak O kam u wym sñiawthooh, mut hi O u pynrap tæ ym neh sarom O neibhah kam uwa chong chnong em bait i ktah hawa yoh ki bru kiwa na baar u klam pynrem kamtæ.
Tæ da ini i thoh, kyrpaad kyrpon O ya kiwa toh sap u ri u sumaar ya kani ka nan wow sñiawbha ki u chimkhia wow thooh ki laad ki luti wow pynkhooid ya kani ka nan. Kyrpaad leh ya kitu ki dukan wa em ha Stand War wa katu ka Hostel wa em heitu wow dam noh ki u pynkai pyntooid yaka um jakhlia cha kani ka nan khnang yow man ko kawa khooid. Lada kani ka nan man ko kawa khooid, ki dakha wa em ha kani ka nan daw chait daw khlan wei daw roi daw paar ki.
Wei manda boon ki dakha daw yoh wow kem wei u dai leh neibhah kani ka nan kamwa da yoo phi ym em ware u khian ko, neitæ lada pynman daka yakob khwe daw pynmih nong chooh chooh ya kitu kia pait wa man tre yaka. Daw wanrah ko leh yei khooid yei jngiar wa yei naam yei burom yaka sor Jowai wa yaka ri Jaiñtia hi waroh kawi.
Discussion about this post