Kylli ka AJCCTA na ki MLA wa katwon ngut wa yoh myntoi na i challan tooh ya u mooyong

Jowai: Ka All Jaintia Cement and Clinker Transporters Association da dawa ko wa ka sorkar toh u e pynche ko cha ki paidbah hajrong ka hukum yong ka Supreme Court neibynta ka kaam tih wei challan mooyong ha ka jylla.

“I lyngngoh i wa ka sorkar hapoh i yahkhmat u Conrad K Sangma kam u Chief Minister wa emburom ileh wa pynwiar ngeiñ ya ka hukum ka SC hajrong ka rai wow pyllait noh u tih wei wow challan mooyong wa khang ka NGT ha ka jylla nadooh u snem 2014”, da ong u President ka AJCCTA, u Balen Thubru.

Ka AJCCTA da ong ko wa palat 7 bnai kattu wa ka SC da chah biang ko ya ki paidbah ka jylla wow tih wow challan mooyong deiwa bood leh ya ki kyndon yada rymaw katkam ka MMDR Act, tangwa hadooh katni ki paidbah ym pu yoh laad ki wow tih næ challan ya u mooyong wei ini da pynlyngngoh ym du yaka AJCCTA wot hadooh ya kiwa boon kiwa lang.

“Ileh wa kani ka sorkar ym kwah ko wow pynkrehkaam ya katai ka hukum ka Supreme Court?” da kylli ka AJCCTA ya ka sorkar jylla.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Kam wow pynkynmoo wa ka NGT da khang ko wow tih wei wow challan nadooh u snem 2014 wei ka Supreme Court da pynmih ko ya ka hukum ha ka 3 tarik July, 2019 wow elaad biang ya ki paidbah wow tih ya u mooyong deiwa bood ya ki aiñ tih kamjooh ki aiñ yada rymaw deiwa khlem pynyap leh yaka hukum ka NGT.

Ileh wa ka sorkar kwah ko wow pynman be-aiñ lane kam kawa Ar-Nombor wei yohnong kiyi hajrong ka kaam khayi tooh ya u mooyng? Da kylli u President katai ka seiñ.

Ka AJCCTA da pynsñiaw ko leh yei elaad ya kiwa khayi tooh ya u mooyong wa da booh yei eh hadooh kattæ ya kiwa khayi hi, neibhah wot lada lait ki na waroh ki Check Point ki pulit ka Meghalaya tangwa manda poi cha Assam kat wym pu dai næ yoh poisa ha kti, ki kjat yong uwa dai næ kiwa khayi tooh da em ki ha kawi ka sarok kawi won da em chwa cha thanat ki pulit Assam.

Ka AJCCTA da kylli ko leh ya waroh ki 60 ngut ki MLA ka jylla wa ileh suki kiaw ki hajrong kani ka hukum ka SC? Wei katwon ngut napyrdi ki 60 ngut kiwa yoh wow kamai cha kata yong ki na i khayi tooh ya u mooyong?

Hawa kyruiñ won cha u mooyong uwa 32 lak ton hapoh ka jylla uwa da dep tih wei da dep u kheiñ, wiar u cheiwon, kylli ka AJCCTA.

Ka AJCCTA da kyntu joor ko ya waroh ki tre paar mooyong, kiwa khayi mooyong, ki tre truck wa ya ki seiñbhalang wow mih chakhmat wow ya krehlang waka AJCCTA wow yaleh pyrchah hajrong ini i kaam be-aiñ yong ka sorkar wei wow pyndooh pyndam noh ya ki kaam be-aiñ chi syndon, pynkut ka khubor na u President ka seiñ.