Jowai: Ka North East Students’ Organisation (NESO) ka chatri ki 8 tylli ki seiñ ka thaaiñ mihsngi wa kynthup yaka Khasi Students’ Union (KSU), All Assam Students’ Union (AASU), Naga Students’ Federation (NSF), Mizo Zirlai Pawl (MZP), Twipra Students’ Federation (TSF), All Manipur Students’ Union (AMSU), Garo Students’ Union (GSU) wa All Arunachal Pradesh Students’ Union (AAPSU) da pynhær chithi ki cha u Prime Minister ka ri u Narendra Modi wa cha u Union Home Minister u Amit Shah yow pynsñiaw yei pyrchah yaka Citizenship Amendment Bill, 2019.
Ka NESO da ong ko wa pyrchah ko yei mynjur ka Union Cabinet ya kani ka Bill kawa daw e hok man tre ri ya ki nong Bangladesh kiwa man ki Hindu, Sikh, Buddhist, Jain, Parsi wa ki Christian kiwa da psiah chwa pyrchah yaka aiñ chapoh ka ri India deiwa booh yaka 31-11-14 kam ka tarik khaddooh ya kiwa da psiah chwa yow kheiñ yaki kam ki tre ri. Hajrong ini ka seiñ da ong ko wa ka thaaiñ North East em ko ki tre chnong kiwa man ki jaitbru khian paaid ha waroh ki jylla yong ka wei u pood waka Bangladesh wa jrong 1741 Km da wanrah chwa ko yei psiah tooh chapoh ka ri nadooh wa phiah yaka ri kamjooh heipor wa yoh laitlooid ha u snem 1947 wei heipor ka thma Bangla iwa da ktah khamtam yaka jylla Tripura heiwa ki tre chnong da man ki ki khian paaid wei da em ki du 30% na waroh kiwa em hapoh ka jylla, ha ki 11 tylli ki District ka Assam na ki 24 tylli ki District, ki tre ri da man ki kiwa khian paaid.
Kamtæ ka seiñ da kylli ko naka sorkar India lada yachah ko yaki tre ri næ yaki baar ri wa psiah tooh cha ka ri? Tangwa deiwa pait yei rukom leh ka sorkar da che wa yachah ko ya kiwa psiah tooh, heiwa i kamram ka sorkar toh wow yada ya ki tre ri yong ka na ki bor wa na baar tangwa deiwa pynkylla ya kani ka aiñ heithaw wow phah liwan ki da pynkup pathan ha ki ya i hok wow man tre ri ki.
Ini daw pynchlur chooh chooh ko yei psiah tooh na Bangladesh kiwa katni em 140 lak ngut ki Hindu wei ini i chet kylla ka sorkar India da booh ko yei maa wa joor bha yei im ki jaitbru ka thaaiñ wei daw wanrah ko leh yei sñiaw jngai ka thaaiñ wa i wym ya sñiawthooh waka sorkar haka kaam synchaar khadar, pynkut ka NESO.
Discussion about this post