Ka Seiñraij Jowai kam kawi wa em ya ki madan wa ki yung yalehke, deiwa wan ka Meghalaya Games ha Jowai, da chah jied ki kattu katni ki madan, ki yung yong ka yow pynman ya ki jait yalehke waphær waphær, wei deiwa chah jied sñiawkmen ki leh wa yoh ki yei myntoi nadooh i pynchna pynbha pynmiat yaka Gallery ha Madan Ryngkaw, Tpep Pale, i ñiaam rong ya ka Indoor Sports Hall ka Seiñraij wa kamjooh ya ka skur iwa da leh da ka State Sports Council ka sorkar jylla.
Tangwa heiyatoh won wa ka Madan Biar Ka Blai wa em ha Lion Mission Compound Jowai, neiliang u General Secretary ka Seiñraij, u Arwotki Sumer khana u wa ki bor District da paan NOC ki naka Seiñraij yow pynemkaam neibynta ka Meghalaya Games, wei ka Seiñraij Jowai leh hajrong kani ka yurim da pdiang ko ya kani ka lympung wa wan ha ka District wei heiyatoh wa katai ka thaw da thoh che wa em ko hapoh i bichaar ka DC Court.
Wei ka NOC toh neibynta u pynemkam katwa heiyatoh won wow pynkreh pynchna won khana u wa neiliang ka Seiñraij Jowai wym ye ko u ong iyi iyi leh katwa dang em ko ha kti ka Court.
Tangwa na ki sngi cha ki sngi da yoo ki yei pynchna pynmiat, tæ hawa thooh yutip da chem ki wa daw pynman ya ka Volleyball ha katai ka mandan. Kamtæ hajrong ini da thoh ki ka chithi cha u Deputy Commissioner ka West Jaiñtia Hills District, wa neiyi i daw wym em khut yaka Seiñraij kam kawa e NOC heiyatoh wa katai ka madan. Wei lada yoh bor hi ki mo naka Court neibynta u pynchna pynmiat pynmadan.
Neibhah neiliang ka Seiñraij waroh chi kattu wym em u leh ko iyi iyi katwa toh haap ko hapoh i pait ka Court heijooh i por da ong leh wym em pyrchah yei pynmiat pynbha wow pynemkaam neibynta ka Meghalaya Games.
Discussion about this post