U Principal ka St. Edmund’s College, u Dr. Sylvanus Lamare da ong u wa i dawa wow pynpsiah ya ka ktien Khasi ha ka 8th Schedule ka riti synchaar ka ri da pyrchang kattu la 44 snem, tangwa ileh wym yoh ko u psiah hadooh katni toh wa ka sorkar India da booh yukylli ko kayi ka kyrdan yong ka ktien Khasi katni ha ka thoh ka puræ.
Hawa klam ha ka yalang kynmoo warom ya ka lyngkhooh sngi yap wa 112 snem u Babu Rabon Sing Kharsuka, u Dr. Lamare da ong u wa kam ka ktien sikai katni, ka ktien Khasi ka em ko du hadooh Class IV, katwa ha u snem 1902 da em hadooh Class VI, wei ka sorkar India da kylli ko wa ileh ka ktien Khasi katni da puræ du hadooh Class IV, katwa ha ki snem 1902 da puræ ya ka ktien Khasi hadooh Class VI.
U Dr. Sylvanus uwa man leh u dkhot warim ka Sahitya Academy da ong chooh chooh u wa ka sorkar India da kylli ko leh kiyi ki kot wa ye u puræ hei ktien Khasi, ye hi u lai puræ ya ka Maths da ka ktien Khasi, ye hi u lai puræ Science ha ka ktien ktien Khasi, iwa mut wa lada i dawa wow yoh yei tipmit dang lai hi ko mo wa i dawa ka jaitbru. Da ong u leh wa lada wan ka National Education Policy 2020 ye hi mo u pynbiang ya kitæ kiwa emkaam. Da ong u wa ki mandien da dep ki u leh wei da ieh ki ha kiwa katni ya iwa sah wow yaleh ki.
Ha iwi won i liang, u Dr. Lamare da ong u wa da yoo wa ha ka tayaw wa dadep wa u Montri Rangbah ka jylla, u Conrad Kongal Sangma da pynbna u wow e da ka ‘Award’ ya kiwa thoh kot, deiwa pynrap wa ym toh wym emkaam ka Award ya kiwa thoh, tangwa i yukylli wa mih katni daw man wa cheiwon wiar ka State Literary Award kawa khlem da e de da boon snem, wei da pynsñiaw u toh u pteiñ ya kayi kawa da leh.
