Ka Workers Power of Meghalaya kawa man ka seiñbah yong ki kynhun ki wakreh mylla hapoh ka jylla, da pynsñiaw ko yei sñiawlem cha kiwa ha yung hasem yong ki arngut ki Nurse ka jylla kiwa da khlaad noh na i yakhun wa ka khlam COVID-19.
Hajrong ini i jia wa sñiawsih, neiliang ka seiñ da kylli ko cha ka sorkar wa cha ki Hospital ki bru samen wa lada i rukom pynbait ya i rukom booh kaam namo ka Duty man ko næ ym em kawa biang lane kawa e ha ki jooh hi ki bru khlem da em i kylliang ya ki wakreh ha i rukom wa biang.
Da kylli leh wa lada ki Hospital ki bru samen lane ki Hospital sorkar biang ki næ ym em ya ki Nurse, ki Paramedic, kiwa pynkhooid hapoh ki Hospital wa Health Center waphær waphær yong ka jylla? Neibhah katkam wa chem ka seiñ lynga ki kattu katni ki para wakreh kiwa ha ki thaw sumaar, da pynsñiaw ki wa duna ki wakreh wa iwi na i eh wa yachem ki na ka sngi cha ka sngi toh wa hap u kreh palat ya ka kynta krehkaam wa da booh wei hawa nujor wa ki por wa nachwa wa ha kini ki por khlam, da hap wow kreh ar chah le chah.
Ka seiñ da kylli ko leh wa lada kini ki thaw sumaar ya kiwa yoh COVID-19 pynbiang ki næ ym em ya ki tiar yada kiwa biang kam ki PPE, ki Mask, ki sapkti wa kiwi kiwi wa emkaam neibynta kitu waroh kiwa yakhun ya kani ka khlam?
Ka seiñ da kylli ko leh yei rukom pynbiang ya ki thaw sah wa i baam i dih ya ki wakreh waphær waphær kiwa yoh COVID-19 heipor wa kreh ki, khamtam kitu ki wakreh hapoh ka Covid Ward lada liwan ki cha yung næ yoh ki yei thaw sah wa biang kamwa man ha u snem wa da dep heiwa da pynbiang da ki Hotel wa ki skur.
Hawa yatoh wa i pynbna ka sorkar jylla kawa da mih ha ka 17-05-2021, da kylli wa lada krehkaam ko du neibynta ki wakreh ha ki yung krehkaam sorkar lane krehkaam ko salonsar ya waroh ki kynthai wakreh mylla hapoh ki Hospital wa ki Health Center waphær waphær wa kynthup ya ki Hospital ki bru samen wa lada pait bniah ki yei emkaam ki kynthai wa punkhon lane kitu kiwa em hapyrdi i doh i pran wym chait wa toh u yoh chuti ki deilang wa i su (Paid Leave) ha kam ini i por wa wan ka khlam?
Da kylli leh wa lada ki thaw sumaar pynbiang ki næ ym em ya ka kari wa lai booh wei lai thooh ya ki wakreh iwa kynthup nadooh ki Security Guard, ki Cleaner, ki Paramedic, ki Nurse wa kiwi kiwi de kiwa hap wan cha ki thaw kreh wot lada toh hapyrdi u slap lane kiwa sah jngai.
Kamtæ hajrong ini, ka seiñ lyngba kani ka kyrwoh, da kwah ko wow pynsñiaw cha waroh ki Hospital wa khamtam dooh cha ka sorkar wa toh u pait bha ko hajrong ini i bynta khamtam kitu kiwa ngat ha ka Covid Duty wa ym chah nioñ beiñ ki deiwa hap kreh ki palat kynta, khlem da biang de i por baam por dih wa i por chong ngiah .
Ka kyrwoh na u Kenneth Swer, General Secretary Workers Power of Meghalaya.
