Ki Hindu ka Shella Block lyngba ka Ichamati Bhologanj Welfare Organisation da thoh ki ka chithi (Open Letter) cha u Naba Bhattacharjee yow kylli uyi man u wow klam neibynta ki Bengali ka Meghalaya.
Da e nongmuna yeiwa klam ka Shillong All Faith Forum (SAFF) haka 29 tarik uni Naichiphaw wa ki laad pathai khubor yow pynche wei yow pyn jai-jai yei sier mynsien ka imlang sahlang kawa da ya kyrchaan lang da waroh ki jaitbru wa ki jait niam. Tangwa da ong won wow chim hi-eh yeiwa klam kiwa chah pynbor, kiwa da chah yahbkla kam i yong sakhiat ya ki bru ka Shella Block toh iwa ym em yooluti naka SAFF.
Da ong leh i kdaw chaphang ka yalang ha Bholaganj ha ini i yaklam wa ki laad pathai khubor, deiwa ong wa ki Bengali ka Shella Block ym em maad ki yei chah leh chilliang toh iwa da dep pynche pyn da kiwa yahkhmat ka Shella Block chaphang ini i jooh. Hanla ki dkhot ka SAFF da ong ki wa ki bru ka Shella Block ym em maad ki yei chah leh chilliang katkam wa da sñiaw ki na i Video.
Kamtæ da kylli uyi oo u Naba Bhattacharjee heiwa da kheiñ ya oo kam uwa mihkhmat ki Bengali ka jylla, uwa da ye wow e wow e ktien neibynta ki Bengali ka Meghalaya, da kylli leh ynnu jooh em wa jied ya oo da ki paidbah yow mihkhmat ya ki Bengali? Heiwa kiwi ki dkhot ka SAFF toh ki pastor, ki phadar niam katwa ki seiñ niam kam na Rama Krishna Mission (RKM) lane ka Bharat Sevashram Sangh, ka Brahmo Samaj, ka Viswa Hindu Parishad (VHP) kamjooh kiwi ym em khut wow mihkhmat ya ki Hindu ka Meghalaya heiwa u Bhattacharjee i em yatoh u wa ka niam toh du kam u President ka Central Puja Committee, Shillong kawa i kaam yong ka toh wow pynman wow pait yaka Durga Puja chisien chi snem.
I kam wa ki Hindu ym em chah lehbeiñ du neiwa pait ya i Video iwa da chna wa pynkylla yow yoo la kam wa waroh biang hi wa da klam haka yalang ha Bholaganj toh iwa da dep pynche, tangwa u Bhattacharjee won ngait bait u ya ini i Video uwa ym jooh em wow lai leh cha ka Shella Block ha kini ki snem tangwa hakhmat ki laad pathai khubor won mynjur bait u ya waroh iwa ong.
Kamtæ da ong wa u Bhattacharjee hawa e u yei klam, da ong u ki nong Meghalaya ym toh u chah yahbakla ki ha kiwa na baar. Ini pynyoo ko wa u Bhattacharjee ym sñiawthooh u yei mut i ktien manda ong kiwa na baar heiwa kini ki bru wa ong u toh kiwa sah hapoh Meghalaya boi kiwa da lai cha lait kiwa em hok leh wow klam chaphang ka jylla.
Da ong leh wa wa i kam u wa i lehkmen Puja toh kawa lai bait deiwa mylliñ u ya iwa jia ha 1979, 1987, 1992 heiwa boon iwa tieñ bar ya iwa lehkmen.
Kamtæ da kyntu ya u Bhattacharjee lada kwah u wow klam neibynta ki Bengali wow tip chwa ya iwa klam u chwa wow mynjur hi-eh.
Puræ leh: Pynche ki 5 ngut wa i Video wa riñ ha i yahcem wa u Syiem ka Sohra toh iwa murieh yeiwa sakhiat
