U MLA ka Voice of the People Party (VPP), u Adelbert Nongrum da kylli u na ka sorkar hajrong i pynman ya ki yakob khwe dakha ha kylleiñ ka jylla, khamtam wa kani ka kaam yakhle da ktah ko leh ya ka kamai kajih wa ka bai baam yong kiwa boon ki manyung kiwa duna i yoh i kot.
U Adelbert da pynsñiaw u yeini deiwa wanrah ya ka Zero Hour Notice hapoh ka yung dorbar ynne ka sngi heiwa da pynsñiaw u yei sñiawkhia leh hajrong i jia ha ka 16 tarik uni u bnai heiwa kawi ka manbei da hap ko wow kha khon hapoh kari iwa da khlaad noh du hadien kajiak por, wei ini i jia da mih du neidaw wa ka kari kawa kani ka manbei chong ko da sahkut ko hapyrdi sarok hadooh 3 kynta neidaw wa em kani ka yakob khwe dakha waka Lucky Draw ha kawi ka nan wa em ha rood u sarok Pamphyrnai.
U MLA ka VPP da kylli u ya ka sorkar wa lada tip ki namo ym tip ki yeini i chah ktah kiwa boon ki manyung nei chah ban nei pynman ya kam kitai ki yakhle khwe dakha kawa hap wow su da ki hajar tangka yow chimbynta wei kiyi ki laad ki luti wa ka sorkar u chim ko.
U Adelbert kam u MLA ka Liang Pyrchah da kylli u leh ya ka sorkar iyi u leh pyrchah ya u Deputy Commissioner ka West Khasi Hills uwa da e bor wow pynman ya kam kani ka tamasa hakhmat sarok iwa da ktah yei lai i wan i yieñ ki paidbah wei kamjooh ka sorkar iyi u leh ko ya u Superintendent of Police ka West Khasi Hills u wym ye u pynbiang ya ki laad wow pynlait yei eh ha itai i sahkut kari, khamtam leh hadien wa da yoo yei chah riñdur uwi u pulit wa embynta wow saam khusnaam leh ha katai ka tamasa.
Neidaw wa kani ka wanrah ya ka Zero Hour Notice toh kawa jhan wei khlem da yoh laad wow pynkhreh yei jubab, neiliang u Symbood Montri Rangbah wa pait ya ki Kaam Pohyung, u Prestone Tynsong da kular u wow wanrah yei jubab deiwa e dei thoh hapoh ka dorbar.
Discussion about this post