Kylli u Ardent wa lada em i thmu ka sorkar wow pyndam ya ka Committee wa takit yei tih mooyong pyrchah aiñ

U MLA ka Liang Pyrchah, u Ardent Basaiawmoit ynne hapoh ka yung bichaar da wanrah u ya ka Cut Motion neibynta ka Grant wa da wanrah da ka Montri ka chnat aiñ, ka Ampareen Lyngdoh.

Hawa e yei klam, u Ardent da kdaw u yei tlot ka sorkar heiyatoh wa ka aiñ deiwa ong wa emkaam ko ki bru wa biang wa tip aiñ neibhah ymtip hadooh katwon tylli ki mukotduma wa da jop da ka sorkar neibhah da chem nadooh nachwa wa tlot bha ko wow yasaaid, kamtæ da emkaam bha wow jied ya u Advocate General da uwa stat wa chemphang ymtoh deiwa biang i ya tipmit.  

Heiyatoh wa mih khubor wa ka sorkar da thooh laad ko wow pyndam noh ya ka Committee samen bru wa da thung da ka High Court ha u April 2022 wa khlieh da u Justice (Rtd) B.P. Katakey yow takit yei tih wei chalan mooyong pyrchah aiñ heiwa kani ka Committee da chem ko wa dang pteiñ hi ki kaam pyrchah aiñ.

Neiliang u Ardent ong u wa ini i sai pyrthai u Justice Katakey yei tih mooyong pyrchah aiñ da pynkhuslai ko ya kiwa em hei bor kamjooh ki Coal Mafia ka jylla neibhah lyngba kani ka Committee da pynmih ko palat 24 tylli ki Interim Report wa pynyoo wa dang em hi i tih mooyong pyrchah ya ka aiñ kamjooh i chalan.

Related posts

Du ha Eastern West Khasi Hills wym em dukan dai kaid kawi leh, boon dooh ha West Garo Hills

March 12, 2025

Ka Laskein Block kam kawi na ki wym pu yoh thaw yow booh ya ka skur EMRS

March 12, 2025

Da ong u leh wa ini ymtoh i sien wa nyngkong wa tuklar ka sorkar heiwa wot ya ki sahep ka Lokayukta leh da chah pyndam deiwa e ki daw wa khian wa nai.

Kamtæ u Ardent da ong wa kopsar da em kiwa tieñ wa kani ka Committee daw sai pyrthai ko yei emktilang ki bru wa em hei bor wa ki Coal Mafia wei yow lait yeini da kwah noh ki wow pyndam noh ya u Justice (Rtd) Katakey.

Hajrong ini da kyntu ya ka sorkar wow e laad ko wow leh kani ka Committee yei kam wa da pynkit.

Ka Ampareen hawa e yei jubab heiyatoh wa u Justice (Rtd) B.P. Katakey da ong ko wa ya uni da thung da ka High Court wow khlieh ya ka Committee wei ka kam ka Montri kamjooh ka sorkar jylla ye ko wow yaklam chaphang ini neibhah dang em i hapoh i bichaar.

Da kyntu ko wym toh u sñiawthooh bakla wei wow pynsñiawthooh bakla wa ka sorkar da rem lut ko ya waroh ki mukotduma wa da yaleh ko wot hapyrdi wa tyngkylleiñ ki kyndon ka riti synchaar, u pyrchang wow yoh yei hok.

Da ong ko leh wa lada em i tlot ha iwon iwon, u yaleh u pyntoh pyntne wei wow chakri ya ki paidbah.  

U Ardent hadien wa yoh yei kular na ka Montri yeiwa da sñiawkhia u, da pyndam noh u ya ka Cut Motion.