Ynne ka sngi ha ka Dorbar Mang Tangka ka JHADC, u MDC ka Mukhla Ummulong, u Nehimaia Lamare da kylli u katwon tylli ki thaw uiñke suwari wa da tipmit ka Council hadooh 28 tarik u Thohlakhmi (Feb) 2025.
Hawa jubab yeini, u EM, u Lasky Rymbai da jubab u wa ympu em u tipmit ya ki thaw.
Hajrong ini, u Nehimaia da kylli u wa katkam ka mang tangka da booh hadooh Rs. 1.25 klur wow pynku ya i kaam uiñke suwari (Promotion of Tourism) tangwa kammon tang i thaw wym em.
Hajrong ini u Lasky da jubab u wa kani ka chnat Tourism toh kawa dang thymme kawa em hapoh ka Arts and Culture Department weiwa daw khut ya ki paidbah wow wan pyntipmit ya ki thaw uiñke wa em hapoh Ri-loom Jaiñtia.
Chooh chooh da kylli lada em ki kyndon wow tipmit ya kitæ ki thaw, heiwa da jubab wa dang pynkhreh ya ini khnang wow ye u khut wow pyntipmit ha ka chnat.
Discussion about this post