U MP ka Shillong cha Lok Sabha, u Vincent H Pala da ong u wa ka sorkar da toh wow thung da ka kynhun takit wa laitlooid khnang wa ki paidbah u che ki yei pynbaad wa em i pynemkaam bakla ya u khoo paidbah wa da yoh ksoh da ki pulit Assam kamwa 1 lak churia.
Da kylli u leh ya kiwa yahkhmat ka United Democratic Party (UDP) kiwa da suki hi-eh hajrong ini i bynta neidaw wa toh lyngba ka chnat wa pait da u MLA ka UDP, u Kyrmen Shylla kam u Montri ka Social Welfare. Da ong u ileh wa kiwa yahkhmat ka UDP suki ki hajrong kani ka phang wei ileh wym chimkhia wow dawa lang da ka kynhun takit kamwa da leh ha ka huri hura yong ka MeECL.
Da ong u wa kani ka phang toh kawa ktah bha neibhah ini toh i bynta i hok ki khynnah, deiwa ong wa ki khynnah toh u yoh ki ya u khoo lyngba ka Social Welfare iwa man 100g neibynta ki Primary wa 150g neibynta ki Upper Primary, wei ka Meghalaya em ko kamwa 3.85 lak ngut ki khynnah skur Primary wa 1.5 lak ngut ha ka Upper Primary wei lada kheiñlang i emkaam ya u khoo man ko 2560 ton neibynta 3 bnai.
Da ong u wa lada em i takit daw ye u tip leh ha kam ini i por wym em man skur, heiwon da pynemkaam ya utai u khoo wa toh u yoh ki khynnah yong ka jylla, deiwa pynrap biang wa ka UDP kawa emlang ha ka sorkar ym toh u suki hi-eh wei toh u thooh bniah hajrong ini.
Hawa kylli hajrong i kyntait u Montri Rangbah ka jylla ya itai i pynbaad, u MP ka Congress da ong u wow kyntait næ wow ong wa ym em itæ i leh bakla ya utai u khoo ym ye wow man neibhah ki pulit Assam da e ki da ka FIR, wei da pynrap chooh chooh wa ka kynhun takit man ko iwa emkaam neibynta wow tip yei sakhiat neibhah uni u khoo toh neibynta ki khynnah kiwa dooh wa kiwa chitom, ya uwa da bhah na ka sorkar India wow yoh ya ka Sustainable Development Goal nadooh u snem 2010 deiwa e baam wa tei yei doh i pran ya ki khynnah.
Katkam i ong u Pala, ka sorkar India du neibynta ka Mid Day Meal da mang ko T.11.59 klur du neibynta chi Quarter, wei neibynta ka Supplementary Nutrition Programme da bhah kamwa T. 6 klur chi Quarter ha ki snem wa da dep, iwa mut wa em i pynlut wa boon neibynta ini i kaam, deiwa pynrap bait wa emkaam wow takit neibynta i che ki paidbah wei kamjooh wow che hajrong i pynbaad wa em i dak wa sih ka Continental Milkose Pvt. Limited kawa chimkti ya i kaam.
