Hadien waka sorkar jylla dang pteiñ hi ko wow khang ya kiwa chongdai cha rood sarok namo kiwa chongdai madan heiwa ha Jowai khamtam ha ki bynta nadooh na laad DC ha Jowai hadooh wa poi ka yaw Chyiap da dap ki rood sarok da kiwa chong dai heiwa haka 24 tarik u bnai wa dep da chah beh ki haki bor District. Tangwa hadien ini da pteiñ biang i chong dai ha rood sarok, neiliang ka sorkar da e ko leh haka chnat Urban Affairs wow pynbait ya ini i kaam hapoh ka jylla yow pynyoh thaw chongdai.
Ha Jowai ynne ya kiwa chong dai da e thaw chong yaki hapoh ka yung pynman yaw ka Seiñ Raij Jowai wa em ha Iawmusiang iwa da pynkyllooid leh yaki luti ki syngkeiñ ha kini ki bynta wa da khynnia.
Hawa yoh u yaklam wa uwi na kiwa chong dai uwa ynne da chong dai ha i thaw ka Seiñ Raij, da ong u wa ini wa dep da hap u wow chong dai charood sarok neidaw oo toh uwa chong dai ha yaw Chyiap wei kani ka yaw man ko kawa khang wei kattu manda wai biang kani ka yaw daw lai chong dai biang u ha kani ka yaw.
Da pyntip u leh wa ynne da yoh ki yaki Number naka Market Committee kani ka yaw yow chong dai noh sngi pood deiwa bood yaka palai Even wa Odd Number.
Da ong u leh wa lada man salonsar u beh ya kiwa chong dai, wei lada krehlang kiwi, ym em phær u chongdai kamwa da leh ynne ka sngi tangwa manda em kiwa yoh u chong dai cha kiwi ki thaw tæ mih noh i eh wei kiwi leh daw bood ki.
Kamwa da yoo ynne, kiwa thied psiah hi ki cha ki thaw wa em kiwa chong dai wei ym em i ood leh neiliang yong ki.
Ynne ka sngi man ko leh ka sngi wa chah u wai dukan kamjooh wow chong dai wei hadooh i janmiet i khooid ka Iawmusiang dang neh hi i kawa da pynkhooid yonglang ynnin ka sngi, wei ha kini ki sngi wow wan daw tip hadooh katwon u neh i khooid wa iwa da pynbait ynne ka sngi.
