Hadien wa da pyndam ka sorkar jylla ya ki kyndon kamai kari deiwa bood katkam ki Odd/Even Number haka 16 tarik u Naikhynde, iwa kynthup lang leh yei mih i lai ki kari yong ki bru samen, ha chnong Jowai da sdang biang i khynnia wei sahkut kari khamtam ha ki thaw wa pynman yaw hapoh ka chnong.
Kiwa kamai Local Taxi kiwa em hapoh ka West Jaiñtia Hills Taxi Owner’s & Driver’s Association (WJHTODA) hadien wa da bood ki yaka kyndon Odd/Even da chem ki katwon lai bait ka kamai kari deiwa bood ya ini i rukom pynbait wei i kamai deiwa mih lang waroh da wanrah pathan ko yei dooh nong heiwa da lut i por hei sahkut ki kari wei lut i nong du ha wow thap phñiang.
Kamtæ ki dkhot ka Association khlem da pynbor ya ki da chim ki ya ka rai wow sdang biang ya ka kamai deiwa bood daka Odd/Even iwa da wanrah leh yei yaroh ya ki na ki paidbah wa boon.
Ki paidbah da ong ki wa ini i rai yong kiwa kamai Taxi da wanrah ko yei myntoi ya ki paidbah wa da kyllooid ka chnong ka thaw kamjooh leh i myntoi ya kiwa kamai.
Ynne ka sngi da man ko ka sngi nyngong wa da bood biang yaka Odd/Even da kiwa kamai Taxi heiwa da chem wa da kyllooid bha khamtam ka Iawmusiang wei da yoo wa em ki por da em boon da ki kari ki bru samen bar ya ki Taxi.
I sahkut ki kari deiwa slem leh da wiar, wei i lai i wan ki kari man i khlem sangeh.
