U DC ka West Jaiñtia Hills District ha ka hukum wa da pynmih ha ka 3 tarik uni u bnai, da pynbna u wa da booh bynta ki thaw ha Yaw Chyiap, Yaw Seiñraij, Yaw Chor wa ha i thaw pynyieñ kari ka MTC yow ye kiwa chongdai madan wow pynemkaam neidaw wym chah wow chongdai cha ki luti kjat wa cha rood sarok.
Kani ka hukum da pynmih leh hadien wa da em i dawa kamjooh i toor kiwa chongdai cha ki luti lai kjat ini wa dep neidaw wym yoh thaw chongdai ki iwa da wanrah kylla yei khynnai ki luti ki syngkieñ.
Neiliang ki Magistrate leh da lai pyntikna ki wa da bood kiwa chongdai ya ini deilang wa u waheh chnong ka Tympang Iawmusiang Dorbar Chnong heiwa da sakhi leh wa khamtam i thaw lai kjat wa em hajan ka JHADC toh kiwa da kyllooid.
I pynbna paidbah hajrong ini toh iwa da pteiñ hadooh ynne ka sngi yow pynkynmoo leh ya ki bru paidbah wym toh u thied na kiwa chongdai ha luti lai kjat wa kiwa chongdai cha rood sarok kamjooh leh ya kiwa chongdai wow ya krehlang ki deiwa chongdai du ha ki thaw wa da booh neibynta yong ki.
Kiwa boon kiwa chongdai madan toh kiwa da psiah cha i thaw wa da booh da ka Seiñraij.
