Kynjoh 10 snem i lai luti ka Khynroo Khyllood Chilliangraij Niamtre Committee

Ka Khynroo Khyllood Chilliangraij Ñiamtre Committee ha ka thong wow pynneh pynsah yei man kyrpang ka jaitbru wei wow tyoor u sikai yei tip niam hapyrdi ki khon ka Ñiamtre, ha uni u snem da kynjooh i lai luti yong ka cha u moomær wa 10 snem.

Kamtæ kiwa yahkhmat ka Committee chirrup wa ka Dorbar Chnong Chilliangraij ha ka sngi Pyngkat 25 tarik Naikhynde da khut pynman ki ya ka yalang lehkmen lehburom ha Yungwalieh hei sakhilang ki khon ka Ñiamtre napoh ka dong ka chnat deilang kiwa wan na kiwi ki dong.

Ha ka yalang wa yoo phooh yoo phieñ yong kani ka sngi, ka Sahakawan Dkhar da e ko ki kyntien pdiang burom, u Boodwanmi Dkhar da siang u ki kyntien ngoohblai ngoohsyiem kamjooh leh wow pachat ki kyntien e mynsien ya ki khon ka Ñiamtre ha kam kani ka sngi, ka Chanlang Pde, Chairperson KKCNC da pynsñiaw ko ka Report Kyllum katwa u Damehiwot Pde, Waheh Chnong Chilliangraij da e u ki kyntien sneiñ kyntien kroo hapyrdi ki khon ka Ñiamtre.

U Arwotki Sumer, General Secretary Seiñraij kam u kongsan wa u Sniawbhalang Rangad kam u symbood kongsan hawa klam da yaroh ki ya ka Khynroo Khyllood Chilliangraij Ñiamtre Committee kawa em i yoo jngai yei miat i bha ki khon ka Ñiamtre.

Related posts

Dei kreh yonglang pynkhreh ka Seiñ Raij Raliang ya ka Kopati Puja

November 17, 2024

Ha ka sngi pynkut ya ka Shad Nongkrem wan e kti u Lat ya ka aiñ Hima Khyrim Act, 2024

November 12, 2024

Chooh chooh u Arwotki Sumer kam uwa yahkhmat ka Seiñraij Jowai khiapyrkhat u wow yoo u chem wa kat nanglai ki sngi ki por ki khon ka Ñiamtre nangkhian nangswai i man heiwa katni em sadu 11% donhi wei ha lyndet ini iyi iyi mih u dak yukylli wow ong, ileh cha kylla ki khon ka Ñiamtre cha kiwi ki ñiam?

Ha kani ka yalang lehkmen lehburom dawan embyntalang leh wow pynchongchit da ki chaad ki rwai sur tre yong ki khon ka Ñiamtre na kiwi ki dong wa kynthup ya ka Loomiongkjam, Panaliar, Loompyrdi Iongpiah, Khynroo Khyllood Committee Seiñraij Jowai, Chlem Hikai Tynre Seiñraij wa ka Seiñtyllilang Ñiamtre Ladthadlaboh.

Kiwi ki bynta wa da pynchat ha kani ka sngi toh i saam ya ki khusnaam namo ki Prize cha kiwa jop yong ka yakob Ngoohblai, yakob Khoh Poit, Dat Mooniaw neitæ i pynkup burom leh kyrpang ya ka Chanlang Pde, ka Samum Pde, ka Emhi Pde wa u Lakhon Dkhar kiwa da yarap yachan ya ka KKCNC da ka Muhor ka Kynthiar wa man-u-bnai heiwa ya kani ka bynta da pyndep da u kongsan, symbood kongsan, ka Langdoh Raij Jowai wa u Waheh Chnong Chilliangraij.