Jowai: Ha kani ka sngi Khyllaw 6 tarik Naichiphaw ki bor pait bor pynlai ka Seiñ Khynroo Khyllood Niamtre Committee- Seinraij Ummulong hapyrdi i wan sakhilang u Pa Doloi ka Jowai Elaka u waheh Puramon Kynjn, waheh O.R. Challam, President Seiñraij wa ki khon ka ñiamtre na kiwi ki chnong, ki raij da pynman ko yei lehkmen leh burom yei lai luti ka Sein Khynroo Khyllood Ñiamtre Committee cha u Moomer wa 20 tylli ki snem.
U Chairman ka Seiñ Khynroo Khyllood Niamtre Committee Seinraij Ummulong kam u chongknor yong kani ka sngi da e u ki kyntien pdiang burom wei wow siang leh ki kyntien ngoohblai ngoohsyiem katwa u Secretary Seiñ Khynroo Khyllood Ñiamtre Committee Seiñraij Ummulong yieñ u wow e ki kyntien watbian heiyatoh wa kani ka sngi.
U waheh Mol Passah, President Seiñraij Ummulong hawa e kyntien hakhap u waboon walang da khanna u wa ya kani ka Seiñ Khynroo Khyllood Ñiamtre Committee-Seiñraij Ummulong da sdang ha u snem 1999 dei yoojngai yong ki khon khynroo khyllood yei tynjooh wa wan hapyrdi ki khon ka Ñiamtre wa em hapoh ka chnong Ummulong wei e u leh i sñiawngooh wa khroo ya ki khon Khynroo Khyllood yong kitu ki por wa kiwa katni kiwa hei kitkhia yongki poi luti ka seiñ hadooh uni u Moomer. Iwa kyrpang chooh chooh chwa wow chong, khut kyrsu kyntu u ya ki para khon ka Ñiamtre waroh wow man kiwa tyrna tyrjin u em bynta ha ka Ñiamtre neibhah kani toh man ko ka thaw wow yoh i yei tip ñiam, rukom, dustur, riti.
Chooh chooh ha kani ka sngi da yoh leh u ap u sñiaw yei klam i kappe na ka Waisa Sumer hajrong ka phang wa ong “I Kamram ka Kchuu ka Siang”, na u waheh O.R. Chllam, President Seinraij hajrong ka phang wa ong “Ki khynroo-khyllood wa ka juk katni” wa kamjooh na u Dolloi ka Jowai Elaka u waheh Puramon Kynjin hajrong ka phang wa ong “ Ka Dorbar Niamtre wa ka pateiñ”.
Da pynkyrpang chooh chooh yei man kani ka sngi lyngkhooh snem wa 20 ka Seiñ Khynroo Khyllood Ñiamtre Committee Seiñraij Ummulong deiwa em i pynkup burom ya ki wasaiñ wadang ya ka wei ha ka bynta wakut wan u Pynsakhiatïeini Kyndiah da siang u da ki kyntien ngoohblai ngoohsyiem.
Ya kani ka sngi da pynchoh pynwyrngia da ki chaad na ki khon ka Ñiamtre Seiñraij Ummulong, JNV Ñiamtre wa kamjooh dei yachimbyntalang kiwi ki chnong ki raij kam na Madur, Khliehtyrshi wa na Wahiajer.
Discussion about this post