Jowai: Ka chah siatiap iong ki ar ngut ki bru ha ki bor iong ka aiñ kitæ toh ka kong (L) Setlang Phawa wa u (L) Deress Siangchai kiwa na ka chnong Wapung kawa da jia ha ka tarik 24-09-2014da dap i chi snem pura. Ini i chah siatiap da jia i ha ka chnong Mookhep East Jaintia Hills District, heiwa da iakhih pyrchah ki paidbah ka wa da pynman da ka Movement for Indigenous People’s Right to Livelihood (MIPRL) hei iatoh wa i khang tih wei wow challan mooiong ka NGT ha waroh ka Meghalaya. Ynne ka sngi ki paidbah iong katai ka chnong deilang wa ki khynnah skur da wan iachim bynta ki cha kani ka ialang paidbah kawa man ha Mookhep.
Hei iatoh wa i dap chisnem ini i jia wa sniawsih ia kini ki ar tylli ki mynsien bru na ka liang ka sein East Jaintia National Council (EJNC) Central Council da pynman ko ia ka ialang paidbah ha madan Mookhep deiwa da iaklam ki hei iatoh wa ka phang chah lehbein iong ka ri waki jaitbru weiwa u tur biet chaphrang iow dawa iaka hok iong kini ki ar ngut kiwa da chah siatiap.
U khynroo Sambormi Lyngdoh General Secretary EJNC da klam u wa nalor wada chah siatiap kini ki arngut ha ki bor iong ka ain, ka jait bru iong i dang chah lehbien chuh chuh ko kamwa chah pymdooh ia ki bor ki waheh chnong, iwa khang ia ki khubor u pynmih ia ki khubor khang chnong wa ka khang ka NGT ia ka khih mooiong. Da ong haroh u wa u dawa ki na ka sorkar iow pynman ia kani ka sngi kam ka ‘Martyr Day’ lane u e chuti noh ki ia kani ka sngi ha ka district man u snem khnang iow ioh u pynem warom man u snem ia kini kiwa da chah siatiap.
Naka liang ka chnong Wapung leh da pynman ko iaka ialang paidbah kawa da pyllai da u ma Rishot Rymbai, da ioh i klam na u ma Satly Ryngkhlem Rangbah Chnong ka Wapung, u ma Wanboon Rymbai General Secretary ka Wapung, u ma Denis Siangchai Rangbah Chnong ka Mookhep, u ma Francis Dkhar Secretary ka Chnong Mookhep, u khynroo Nikson Dohling Organising Secretary HYC wei da e i ngooh i dem na u Tbn N.J. Ryngkhlem.
Hadien ka ialang da wai warom leh ia u mot sah kynmoo ia kini ki ar ngut kiwa da chah siatiap neibynta ka jait bru iong kani ka thain da u ma Denis Siangchai Rangbah Chnong ka Mookhep, ia uni u mot booh nam da chna da ki san tylli ki sein bhalang kiwa kynthup ia ka Meghalaya People United Front (MPUF) CGB, Ri Jaintia Student Movement (JSM) CB, Hynniewtrep National Youth Federation (HNYF) EJZ waka Hynniewtrep Achik National Movement (HANM) EJHD. Ia uni u mot sah kynmoo da chna ha ka chnong Mookhep ha rood ka surok heh wa thiah iap ki arngut ha i thaw wa da e da u ma Denis Siangchai Rangbah Chnong ka Mookhep.
Hadien ka ialang, waroh ki paidbah dei lang wa ki seiñ bhalang wa kiwa ha iung ha sem iong kini ki ar ngut kiwa da dep chah siatiap da lai li booh syntu ki kam ka dak sah kynmoo ha i thaw tyllep ia ki.
Hadien ka ialang kawa da dep pynman heipor sngi, hei jenmiet won ka sein EJNC deilang waka WJNC da pynman ki ia ka thang mombati kam ka dak sniawsih wei sahkynmoo ia kini ki ar ngut kiwa da dep chah siatiap neibynta ka jait bru.
Discussion about this post