Jowai: Kam wa da tiplang wa ka 21 tarik Naiynru khlieh u snem toh ka International Yoga Day kawa man kawi na ki sngi wa kyrpang ha kylleiñ ki ri wa da pynbna da ka United Nation General Assembly nadooh u snem 2014.
Ha kani ka sngi kam wa man ha kiwi ki thaw yong ki ri ka pyrthai, ki bru wa sñiawsuk ka-it u leh Yoga chimbynta ki wow pynyoo yei man kyrpang kani ka sngi, ha Jowai leh yei kynmoo burom ya kani ka sngi da pynman da ki bru ka Art of Living, West Jaintia Hills Unit kam ha Loompyrdi Iongpiah, Chilliangraij wa ha Shangpung Pohchnong.
Ka sien nyngkong i sdang ya kani ka International Yoga Day toh ha u snem 2015, ha uni u snem kani daman ko ka sien wa ynru wei ka phang yong ka toh kawa ong, “Yoga for Health-Yoga at home”.
Hei yaklam wa u Pearlet Toi uwi na kiwa yahkhmat ka Art of Living ha West Jaintia Hills heiyatoh wa kani ka sngi, da ong u wa ha uni u snem neidaw i pynrkhiñ ki aiñ sorkar ym ye de u leh ya kani ka sngi kam wa jooh hapyrdi i boon paaid.
Chooh chooh u Pearlet khutlang u yaki paidbah wa chong chnong wow mih ki chakhmat u ya embynta lang ha ka Yoga neibynta wow man i ki bru wa mahajon heiliang i chait i khiah yong i doh i pran, ka spah mynsien wa hei pyrkhat pyrdaiñ neibhah i ye u leh tikna yaka Yoga man ko i myntoi wa khroo yei pran samen.
