Ka 26 tarik u Duyatra toh kawi na ki sngi wa khroo wa kyrpang yong ka ri India kawa da tiplang kam ka Republic Day.
Kamtæ ka Dorbar Chnong Loomkyrwiang, Jowai leh ynne ka sngi da leh burom ko ya ka Republic Day deiwa pynman ka Drawing-Painting Competition wei em ka yachemlang wa kyrpang yong ki khon ka dorbar chnong.
Ha ka yalang wa yoo chongkun yong kani ka sngi hei pynlai u Daioolang Pakma, Symbood Waheh Chnong najrong ki manbei manpa, waheh wasian da emlang leh u S.D. Laloo, General Secretary, u Chibor Najiar, Adviser uwa da chim ka bynta wa kyrpang wow pynhær ya ka lama le rong ka ri India.
Neiliang u Daioolang Pakma kam u chongknor da e u ki kyntien yahkhmat wei khnana yei parom wa tbian chaphang i lai luti ka ri India hei wow yaleh pyrchah ya ki bor ka sorkar pharæng kat hadooh wow yoh ka ri India ya ka Riti Krehkaam nae ka Constitution ha ka 26 tarik Duyatra 1950.
U Chibor Najiar hadien i pynhær ya ka lama hei e yei klam i kappæ hapyrdi ki khon ka dorbar chnong da ong u wa i kam kiwa chong chnong ka ri India em i i kaamram wa khroo wow leh katkam wa da kdaw ha ka Constitution yong ka ri India kamtæ kyrsu kyntu u ya waroh ki khon ka dorbar chnong wow man kiwa tip u burom ya ka riti krehkaam ka ri wei kiwa em leh i kitkhleih neibynta i roi i paar, i chongsuk chongsaaiñ wei miat i bha ka imlang sahlang khlem da em i ya sñiaw yaphær niam yaphær jaitbru.
Ki khynnah kiwa da jop ya kani ka Republic Day Drawing-Painting Competition 2025 toh u Ove-Elford Laloo 1st Prize, Ka Rikaheiburom Shullai, 2nd Prize wa u Elmonzavivian Laloo 3rd Prize.
Discussion about this post