Ka Loomkyrwiang Dorbar Chnong haka sngi Pynsiñ 15 tarik da pynman ko yaka sngi yachemlang wa kyrpang yong ki khon u loom u pdeiñ ha Yungwalieh kam ka dak wow leh burom yei kynjoh 104 snem i Yungwalieh.
Haka yalang wa da pynlai da ka Samhakani Laloo, Secretary WWO da kdar luti da ki kyntien pdiang burom wei suki wa chi minit kam ka dak i kynmoo warom kynmoo maya ya ki waheh wasian, ki manchwa kiwa seiñ wa sdang ya u loom u pdeiñ kamjooh yaka Yungwalieh neitæ pynbood leh ki kyntien ngooh kyntien dem wa da siang da booh da u S.D. Laloo.
U Lammat-oo Laloo, Waheh Chnong ka Loomkyrwiang hawa e ki kyntien yahkmat hajrong ka thong yong kani ka sngi da niawtang u ya i por nachwa iwa ka dong ka chnat, u loom u pdeiñ em ko ya ki waheh wasian wa chynna jngai neitæ i kylla dur ka dong ka chnat na ki por cha ki por iwa wan dei yakrehlang wei yatylli kam ki khon ka dong ka chnat, u loom u pdeiñ kiwa thrang angnood u wanrah i chongsuk chongsaaiñ wei miat i bha ka imlang sahlang.
Chooh chooh kyrsu kyntu wei khutlang u leh ya ki khon ka dong ka chnong deiwa ong, kamwa ka dorbar chnong em ko chiboon ki kaam wa damut damang u kreh neibynta ka imlang sahlang yong ki bru wa chong chnong khlem da wanrah i sñiaw yaphær, to yakrehlang deiwi i yumut da kawi ka thong khnang wa iwa miat wa bha tam u yoh ki u yoo u sakhi hapoh u loom u pdeiñ, ka chnong ka thaw yong i.
Neiliang u Chibor Najiar, Adviser ka chnong hawa e i klam i kappæ kam uwi na ki waheh wasian da ong u, sñiawsuk sñiaw sarong u ong wa ki bru wa chong wa sah hapoh u loom u pdeiñ toh du ki wa emyatoh wei yajooh yajan na kawi ka kur ha kawi ka kur, na kawi ka manyung ha kawi ka manyung iwa sah toh emkaam u thooh laad i kammon u ye i u pynim pynneh pynsah wei pynjanai yaka yurim yong ka chankylliang ka rap kylliang kawa man ka rukom dustur wa da saiñ yurim yaka jaitbru.
Iwa kyrpang chooh chooh pachat u leh ki kyntien sneiñ kyntien kroo ya ki khon ka dong ka chnat, u loom u pdeiñ deiwa ong, yaleh wow yait nei wohdong wohdaw wei sñiaw yaphær hapyrdi para i.
Najrong i klam i kappæ yong ki waheh wasian da pynkhroo pynkyrpang chooh ya kani ka sngi da i puræ u General Secretary yaka riti krehkaam yong ka dorbar chnong kawa da dep pynjanai ha kiwa boon ki bynta, i e kti ya ki Memento kam ka dak wow pynkhroo yei kaam wa da leh da ki khon ka dorbar chnong neibynta i miat i bha ka imlang sahlang, i e kti yaka song poisa cha kiwa embhah u pam yaka Lucky Draw yong ka Fete 2024 wei khaddooh da pynkut won dei puræ yaka smai yong ka dorbar chnong hei yahkhmat u Daioolang Pakma, Symbood Waheh Chnong.
Discussion about this post