Kynmoo burom ka Loomkyrwiang ya ka Gandhi Jayanti Day deiwa pynkhooid chnong

Ka 2 tarik u Naichiphaw toh ka sngi kha u Mahatma Gandhi kawa datip leh deiwi i ktien kam ka Gandhi Jayanti Day, kamtæ kamwa man ha kiwi ki chnong ki thaw yong ka ri India, ka Loomkyrwiang Dorbar Chnong, Jowai leh dei sñiawkhia da pynman ko i leh burom ya kani ka sngi hei chimbyntalang ki khon ka chnong.

Ha ka yalang yahkhmat yong kani ka sngi da em ka yalang wa tbian hei pynlai u Daioolang Pakma, symbood waheh chnong ka Loomkyrwiang, da yoh i klam na u Lammat Oo Laloo, waheh chnong katwa ki kyntien kyrpang heiyatoh wa kani ka sngi da khana pynsñiaw da u S.D. Laloo, General Secretary.

U S.D. Laloo hei klam da khana u yei parom wa tbian chaphang u Mahtma Gandhi kam u bru wa imsngi wow yaleh pyrchah wa ki bor ka sorkar pharæng da ka luti yong i maya wei khlem em i ya umsnaam (Non-violence) kat hadooh wow yoh ka ri India yei laitlooid nei synchaar ka sorkar pharæng ha u snem 1947.

Chooh chooh iwa bood won klam u heiyatoh wa ka Swachh Bharat Mission kawi na ki Mission wa da e naam e burom ka sorkar India yow Mahatma Gandhi ha ka thong wow pynman ya ka ri India kam kawi na ki ri kawa kaap wa lai chakhmat chirup i roi i paar wei khooid i jngiar.

Related posts

E FIR ki ar seiñ deilang kiwa ri syiar pyrchah ya kiwa kit syiar

July 1, 2025

Sdang biang i slem su tulop ya kiwa kreh Muster Roll | Dawa wow su chwa ka 10 tarik yow yoh u lehkmen Behdieñkhlam

July 1, 2025

Kam wa pynkynmoo ya ka Swachh Bharat Mission da sdang da ka sorkar India hei yahkhmat u Prime Minister Narendra Modi, ha ka 2 tarik Naichphaw 2014 kawa man ka lyngkhooh snem sngi kha wa 146 u Mahatma Gandhi wei ha uni u snem kani ka Mission da kynjoh i lai luti yong ka cha u Moomer wa 10 tylli ki snem.

Ha ka thong yong ka Swachh Bharat Mission dei sñiawkhia yei man kyrpang kani ka sngi ki khon ka dorbar chnong da puræ ki leh ya ka Swachh Bharat Pledge kawa man ka kular wow yakrehlang wa ka sorkar ha ka thong yong i wanrah yei khooid i pliah ka chnong ka thaw.

Iwa kyrpang chooh chooh ha kani ka sngi da pynman leh ya ka pynkhooid chnong namo ka Cleaning Drive heiwa ki khon ka dorbar chnong nadooh ki khynnah hadooh kiwa da heh chimbynta chongchit ki wow lum, u thwat, u sait, u pynkhooid ya ki luti syngkieñ, ki umbaam umdih kiwa em hapoh u pood u ang ka dorbar chnong.