Ynne ka 8 tarik Wisu toh kawi na ki sngi wa khroo wa kyrpang yong ki kynthai ha chityllup ka pyrthai kawa tip leh deiwi i kyntien kam ka International Women’s Day, wei kamwa man ha kiwi ki thaw yong ki ri ka pyrthai, ha Jowai leh da sakhi wa ya kani ka sngi wei da kynmoo burom da ka Women’s Welfare Organisation, Seiñraij Jowai.
Ha ka yalang wa kyrpang yong kani ka sngi wa da pynman ha Yung Dorbar ka Seinraij natlor ki manbei, ki khyllood da wan em byntalang leh da ki manpa wei ha ka yalang yong kani ka sngi u Dr. D.I. Kjam, AH & Veterinary Officer, West Jaiñtia Hills wa ka Dr. Lema Challam, Additional Director, MCH &FW, Directorate of Health Services da man ki kam kiwa chah khut kyrpang.
Ka Hima Lakiang, Chairperson WWO-Seinraij kam ka chongknor yong kani ka yalang da e ko ki kyntien yahkhmat heiyatoh wa ka thong yong kani ka sngi neitæ ka Hunmon Chullai, Vice-Chairperson WWO-Seinraij da siang ko ki kyntien ngoohblai ngoohsyiem katwa hawa kut won ka Soonita Passah, Secretary WWO-Seinraij da booh ko ki kyntien khublei.
Hajrong ka phang yong kani ka sngi ha uni u snem wa ong “Gender Equality Today For a Sustainable Tomorrow”, u Dr. D.I. Kjam ong u, katkam i sikai ka dustur ha ka jaitbru u Ynñiawtrep Niawskum ki kynthai toh man ki kiwa da dep pynkup yei bhah i bynta wa kyrpang iwa ha kiwi ki jaitbru niar u chem kamtae emkaam chooh chooh wow pynjanai yeiwa da em.
Chooh chooh da e mynsien u leh ya ki kynthai ha kani ka sngi deiwa kdar nongmuna u khana parom chaphang ki kynthai næ ki manbei kiwa da jop hei lai luti i im yong ki kam ki bru kiwa hap u maad u takhooh yei tynjooh wakhroo.
Ka Dr. Leema Challam, Additional Director, MCH and FW, Directorate of Health Services kam kawi na ki manbei næ ka bru sorkar watoh u pait u yoo yei chait i khiah ki bru wa chong chnong. Hei klam i kappæ yong ka, iwa hakhmat kyrsu kyntu ko ya ki para kynthai wow man kiwa tip u maya u kheiñkor yei kyrkhu ka rymaw i wym tip kut de wei kam ki pateiñ kiwa im ha kani ka juk wache wastat toh u thooh laad thooh luti wow pynmiat pynbha ya ka wot hapyrdi kiwa boon ki rukom tynjooh næ ki moochynthut.
Iwa bood won i klam i kappæ yong ka ya ki para kynthai toh i chait i khiah, heiwa da kyrsu kyntu joor ko deiwa ong man ki bru kiwa tip wa sñiawthooh yei doh i pran samen hawa leh yeiwon yeiwon i kaam, lada toh heiliang i baam i dih, i kha i pun wa kiwi kiwi.
Najrong i klam i kappæ da pynchongchit leh ya kani ka sngi da ki chaad, ki rwai wa da chimbynta da ki khyllood wa ki manbei na ki dong waphær.
