Ka Women’s Welfare Organisation, Seinraij Jowai leh kam chibynta i yaksohktilang hei leh burom ya ka International Women’s Day, ha ka 8 tarik da pynman ko ya ka yachemlang ki khon kynthai ha Yung Dorbar Ka Seiñraij, Loompyrdi Iongpiah hei sakhilang ka Yoosarda Najiar, District Social Welfare Officer, West Jaiñtia Hills kam ka kongsan, u EMH Passah, Vice-President Seiñraij Jowai kam u symbood kongsan najrong kiwi ki waheh wasian ka Seiñraij Jowai.
Ha ka yalang wa yoochongkun yong kani ka sngi hei pynlai ka Sooneeta Passah, Vice-Chairperson WWO, Seiñraij da yoh i ngoohblai na ka Ribeitki Dkhar, Member WWO katwa yei klam i kappæ wa kyrpang won heiyatoh wa kani ka sngi da e da pachat da ka Rilistina Pyrbot, Member WWO Loompyrdi Iongpiah, u EMH Passah kam u symbood kongsan wa ka Yoosarda Najiar kam ka kongsan.
Ka Rilistina hei klam yong ka da niawtang ko ya ki kaam kiwa ka WWO Seinraij ye ko u leh heityoor i yah luti yong ki yahkhmat waphær na ki snem cha ki snem.
Dei sñiawsarong kam ka manbei, ong ko leh yoosuk u pait wa katkam i yah ka juk ka por ki kynthai ha kini ki sngi da man sakhiat kiwa lai chakhmat ha kiwa boon ki liang, han la kattæ leh ong won ko, ym ye u mylliñ lyndet, wa i ye ki kynthai u kaap u lai chakhmat toh i e bor e mynsien won yong ki chynrang kiwa kup yei kyrdan kam u Kni, u Pa, u Kurim, u Payu, u Diah nae ki khon ki ksu kamtae kam ka kynthai ym hoi u em i mynsien sñiaw hanga, kynmoo wa i burom yow chynrang toh iwa hakhmat nadooh na yung hadooh ha lait.
U EMH Passah won hei e kyntien kam u symbood kongsan, da ong u ha ka kynthai u Blai da e sakhiat u iwa kyrpang hei wow ye ko u kit u bah ya ka lyngkor wa stiñ wa khia nadooh na yung hadooh ki kaam imlang sahlang. Tæ ha kam kani ka sngi, e u i kitbok kitrwiang ya waroh ki khon kynthai yow nang yoh chooh ki yei kyrkhu kyrdooh iwa sarot tam ha waroh ki liang.
Neiliang ka Yoosarda Najiar, DSWO, West Jaiñtia Hills hei klam kam ka kongsan da pynkynmoo ko chaphang ka Theme nae ka mat kyrpang yong kani ka sngi kawa ong “Accelerate Action”, tæ ha kam kani ka sngi kam ka heh sorkar kawa em ha ka chnat krehkaam wa kreh neibynta kiwa boon ki Scheme wa yatoh wei hok ki kynthai ki khynnah, sñiaw ko leh wa toh iwa emkaam wow pynsñiaw u khana hapyrdi ki khon kynthai, ki manbei chaphang kiyi ki Scheme nae ki laad yarap kiwa ka sorkar mang kyrpang ko hei wow pynsuk pynstiñ ya ka lyngkor ki kynthai ki manbei kiwa man ha ki dur ki rukom waphær.
Khaddooh chwa wow poi cha ka bynta wakut chwa wow ah yow Cake wei wow yoh ki kyntien khublei na ka Ridaka Lamar, Secretary WWO Seinraij da em i saam ya ki Prize cha kiwa jop yong ka Walkathon kiwa kynthup ya ka Tipki Chyrmang, Ka Panbiang Kyndiah wa ka Queency Passah katwa kiwa jop won ha ka Marathon toh ka Warisa Sumer, ka Christina Rymbai wa ka Soodawanki Lakadong.
Discussion about this post