Ka 8 tarik Naikhynde toh ka sngi kyrpang yong i thoh i puræ kawa tip kam ka World Literacy Day wei ka thong yong ka UNESCO wow booh ya kani ka sngi toh wow e wyrta chula wei wow khutlang yaki paidbah wa chong chnong ha kylleiñ ki ri ka pyrthai wow man kiwa em i kitkhlieh hei wow kyntu kynrong yei puræ puthi ha man ki chnong ki thaw.
Kamtæ ha West Jaiñtia Hills District dei sñiawkhia ya kani ka sngi kam wow e wyrta chula hapyrdi ki khynnah chaphang ka World Literacy Day, ki skur da chimkhia ki wow pynman ki yakob waphær kam ka dro dur, ka Poetry- Slogan Writing wa ka Recitation heiwa ki khynnah dei jiar i sap wa dei ka-it yong ki da chimbynta chongchit ki.
Ka Tina Lakiang, Secretary SMC R.C. Eve Secondary School Mihmyntdu hawa e kyntien ha ka yalang wa da pynman heiyatoh wa ka World Literacy Day da khanna ko wa hei bor wa khian ha ka thong wow kyntu kynrong yei puræ puthi yong ki bru wa em ha chnong Mihmyntdu da leh kyrpang wow khriñ ya ki khynnah wym jooh lai skur næ kiwa pep skur chiteiñ por wow bien ki u wan cha skur, da yaleh ki u e i chakri wa miat wa bha tam wei katkam wa man hadooh katni boon bha ki khynnah na ki manyung mansem wa ban i duk i tymbuiñ wan ki wow purae ha kani ka skur.
Chooh chooh dei sñiawsarong ong ko leh hawa nujor ha ki por ki snem kiwa dalai wa ki por wa katni i em yong ki khynnah wa lai skur ha chnong Mihmyntdu da boon bha ki wei kani pynyoo ko i dak i chin wa ki bru wa chong chnong sñiawthooh ki u kheiñkor yei kordor yong i stat i tip næ u thoh u puræ.
Neiliang kiwa sikai ha ka thong yong kani ka sngi haman ki skur da chimkhia ki leh wow e i klam i batai ya ki khynnah chaphang i kordor yong i stat i tip ha kani ka juk ka por wa katni neitæ pynchat ki leh deilang ki kyntien e mynsien ya ki khynnah deiwa pynchong yurim hajrong ka mat kyrpang yong kani ka sngi wa ong “Transforming Literacy-Learning Spaces”.
