Kynmoo warom ka Balang Unitarian Jowai yei dap 131 snem yong ka ynne ka sngi

Jowai: Ka Balang Unitarian Jowai ynne ka sngi da kynmoo warom ko ya ka lyngkhooh dap 131 snem kawa sdang ya ka nyngkong hapoh ri-loom Khasi Jaiñtia ha Jowai da u Hajom Kissor Singh.

U Rupaia Lamarr uwa man kam u Moderator ha ka yaseiñ pyrdi sngi da khana u wa u Hajom Kissor Singh toh uwa na Sohra wei manda dap u 15 snem da kylla u cha ka niam Calvinism wei manda da dap u 20 snem da sdang u ya ka Balang Unitarian ha Jowai neidaw wa chem u wa heipor wa em u ha ka niam Calvinism pisa lynga i mynsien u wei hadien wa yoh u yaklam wa u Rev. Charles Dall u Unitarian Missionary na America uwa em ha Kolkata da phah u ya ki kot ki sla chaphang ka niam Unitarian wei manda puræ u Hajom Kissor Singh da sñiaw kmen mynsien u wa em kiwa pyrkhat kam oo.

U Hajom Kissor Singh da chem u wa ka niam Unitarian toh kawa kyllooid wa kawa laitlooid wei ya ka Balang Unitarian leh ha Jowai da seiñ ya ka deilang wa ki yurim ka jaitbru kawa ong “Kamai yei hok” wa i “Tipbru tipblai.”

Ynne ka sngi da kynmoo warom leh ya ka Edict of Torda kawa da dap 450 snem kawa pynman ha Transylvania ha u snem 1568 heiwa da chim ya ka rai wow e laad ya ki paidbah wow jied ki ya jar jiar ki pastor yong ki kamjooh yow lait na iwon iwon i chah lehbeiñ lada em ha kawon kawon ka niam leh.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ka Balang Unitarian ynne ka sngi da khut ko leh ya kiwa na kiwi ki niam wow emlang heiwa u Dolloi ka Elaka Jowai u Puramon Kynjing da e ya oo wow e i klam yong oo uwa da ong wa ha ki ktien u Blai da hikai ko wow maya ya kiwa jan yung jan sem tangwa kiwa choon em ki por mih ki pyn napoh yung ym toh kiwa rah wait rah stieh kini toh kiwa ngait khlem i kitkhlieh ki wym em por wow wandem ha khmat u kynrad wei ki khynroo katni kwah ki wow im cha thaw wa doom ym em kwah ki wow wan cha ka thaw mane heiwa ka niam toh kawa yah luti ya ki bru cha ki thaw wa bha.

U Rev. H.H. Mohrmen hawa e i yalap yong oo da ong u wa hanlada ki bru em ki jar jiar i pyrkhat ym em wa khang ya ki wow maya uwi ya uwi deiwa pait palat yeiwa em i yaphær wei wow imlang deiwa maya hanlada em i yaphær leh.

Da khana u leh wa 450 snem nachwa ha ka Edict of Torda da wanlang kiwa boon ki jait niam yow pynsñiaw yow sñiawthooh yei phær i rukom ngait blai ngait niam ki wei wow e ya ka laad wow mane Blai laitlood wei da pynkynmoo u wa lada em iwon iwon i pyrtuid u Blai hawa kut em du uwi donhi u Blai.

Ha kani ka yaseiñ pyrdi sngi da yoh leh ya i rwai Choir na ki khynroo khyllood ka UCJ.