Ka Chi-Jingmut Society Mynso-B ha i krehlang waka yung krehkaam ka Nehru Yuva Kendra Sangathan Jowai da kynmoo warom ki yaka Constitution Day haka 26-11-22 ha chnong Mynso deiwa pynman yaka yalang wa tbiañ wa pynlai da u khynroo Shembha Lamare uwa man leh u Secretary yong ka Society deiwa emlang ha katai ka sngi wa u Waheh Chnong ka Mynso-B, u President VDP wa kiwa chong chnong ka Mynso.
Da emlang leh u Dawan Lyngdoh uwa man kam u MDC ka Mynsngat Khanduli Constituency, ka Alma Myrchiang ka wakreh ka CBRW Community Base Rehabilitation yong ka chnat Social Welfare wei da yoh leh i puræ ya ki ktien ka Constitution da u Waheh Chnong ka Mynso-B.
Ha katai ka yalang da yoh leh i klam na u MDC uwa da e ya ki ktien kyntu yaka Society wow leh chooh ko ya kam kini ki yalang ki wym jooh bna cha palatsor, wei kam kiwa chong chnong yong ka ri India toh u em i bahkhlieh samen samen khnang yoh u ye u kyntu u kynrong ya ka ri ka yong i.
Neiliang u waheh chnong da chim u ya i bynta u phah puræ ya ka smai namo ka Pledge ya kiwa chong chnong, kamjooh leh da yoh ya i klam naka Alma Myrchiang heiyatoh wa kiwa duna i doh i pran deiwa ong wa la em kiwa duna tymbuiñ, da toh u yarap ya ki deiwa pyntip leh cha ka chnat Social Welfare khnang u yoh ki yei yarap wa boon jait naka sorkar.
Ya i kyntien khublei da e da ka Wilis Syntem.
