Ka 5 tarik Naiynru toh ka sngi watip kam ka World Environment Day næ ka sngi wada mang kyrpang da ka United Nation heiwa kiwa chong chnong yong ki thaw waphær toh u yaklam næ u kreh ki yei kaam neibynta i man ki soodong sookun ka bei rymaw.
Ka Dorbar Chnong Chilliangraij kam kawi na ki chnong ha Jowai wa da ya ksoohktilang ko waka pyrthai chityllup hei kynmoo warom ya ka World Environment Day 2022, ynne ka sngi Bibar 5 tarik da chimkhia ko wow pynman i thung ya ki dien ha ki bynta ka Khloo Langdoh wei wow boodien leh u pait u yoo ya ki dieñ kiwa da dep thung chwa ha ki snem wa dalai.
Ha ka yalang yahkhmat yong kani ka sngi hei chimbyntalang ki khynroo wa ki manbei manpa, neiliang u Oriland Shylla, General Secretary Dorbar Chnong Chilliangraij da pachat u ki kyntien e mynsien heiyatoh waka World Environment Day wei da kyrsu kyntu u leh ya waroh kiwa embynta wow chim ki i kitkhia neibynta i heh i plung yong ki dieñ kiwa da thung ha kani ka sngi.
